ആ ബെസ്റ്റ്!!! ആദ്യ തിയേറ്ററില് ടിക്കറ്റില്ല, അടുത്ത തിയേറ്ററിലേക്ക് പോയപ്പോള് കുട്ടിയെ മറന്ന് കുടുംബം; ശ്രദ്ധിച്ചത് ഇടവേളയ്ക്ക്
തൃശൂര്: റീലീസ് സിനിമയുടെ ടിക്കറ്റ് തീര്ന്നതിനെ തുടര്ന്ന് മറ്റൊരു തിയേറ്ററിലേക്ക് പോകാനുള്ള തിടുക്കത്തില് കുട്ടിയെ തിയേറ്ററില് മറന്നുവെച്ച് മാതാപിതാക്കള്. രണ്ടാമത്തെ തിയേറ്ററില് കയറിയ അവര് ഇടവേള സമയം വരെ കുട്ടി ഒപ്പമില്ലെന്ന കാര്യം ശ്രദ്ധിച്ചതുമില്ല. ഗുരുവായൂരില് ശനിയാഴ്ച രാത്രിയായിരുന്നു സംഭവം.
സെക്കന്ഡ് ഷോയ്ക്ക് ചാവക്കാടു ഭാഗത്തുനിന്ന് ട്രാവലറില് വന്ന സംഘത്തിലെ ഏഴുവയസ്സുള്ള കുട്ടിയെയാണ് കാണാതായത്. ഇവര് ആദ്യം ദേവകി തിയേറ്ററിലേക്കാണ് എത്തിയത്. ടിക്കറ്റ് കിട്ടില്ലെന്നായപ്പോള് അവര് ഉടന് പടിഞ്ഞാറെ നടയിലെ അപ്പാസ് തിയേറ്ററിലേക്ക് വെച്ചുപിടിച്ചു. എന്നാല് കുട്ടി വണ്ടിയില് കയറിയില്ല.
ഒപ്പമുള്ളവരെ കാണാതായപ്പോള് തിയേറ്ററിന്റെ മുന്നില്നിന്ന് കരഞ്ഞ കുട്ടി തിയേറ്റര് ജീവനക്കാരുടെ ശ്രദ്ധയില്പ്പെട്ടു. കുട്ടിയോട് കാര്യം തിരക്കിയപ്പോഴാണ് കൂടെയുള്ളവര് മറ്റൊരു തിയേറ്ററിലേക്ക് പോയ വിവരമറിയുന്നത്. ട്രാവറിലാണ് തങ്ങള് വന്നതെന്ന് കുട്ടി പറഞ്ഞു. അതുപ്രകാരം ജീവനക്കാര് അപ്പാസ് തിയേറ്ററിലേക്ക് വിളിച്ച് വിവരം പറഞ്ഞു. അപ്പോഴേയ്ക്കും സിനിമയുടെ ഇടവേള സമയം ആകാറായി.
സിനിമ നിര്ത്തിവെച്ച് തിയേറ്ററുകാര് കുട്ടി നഷ്ടപ്പെട്ട കാര്യം അനൗണ്സ് ചെയ്തു. ട്രാവലറില് സിനിമ കാണാന് വന്നിട്ടുള്ളവര് തങ്ങളെ ബന്ധപ്പെടണമെന്നും അതിലെ ഒരു കുട്ടി കൂട്ടം തെറ്റി മറ്റൊരു തിയേറ്ററിലുണ്ടെന്നുമായിരുന്നു അനൗണ്സ്മെന്റ്. അതോടെ കുട്ടിയോടൊപ്പമുണ്ടായിരുന്നവര് തിരികെ ആദ്യത്തെ തിയേറ്ററിലെത്തി. അപ്പോഴേയ്ക്കും അവിടത്തെ ജീവനക്കാര് കുട്ടിയെ പോലീസില് ഏല്പിച്ചിരുന്നു. സ്റ്റേഷനില്നിന്ന് കുട്ടിയെ കൈമാറി.
