‘മുഖത്തും കയ്യിലും മുഴുവന്‍ മുറിവുകളായിരുന്നു’; സീരിയല്‍ സംവിധായകനില്‍ നിന്നുണ്ടായ മോശം അനുഭവം വെളിപ്പെടുത്തി നടി
നിരവധി സീരിയലുകളിലൂടെ മലയാളി പ്രേക്ഷകരുടെ പ്രിയങ്കരിയായി മാറിയ താരമാണ് ചിലങ്ക. നിരവധി ടെലിവിഷന്‍ ഷോകളിലും ചിലങ്ക പങ്കെടുത്തിട്ടുണ്ട്. നിലവില്‍ ഭര്‍ത്താവിനൊപ്പം ബിസിനസ് നോക്കിനടത്തുന്ന ചിലങ്ക അഭിനയത്തില്‍ സജീവമല്ല. ഇതിനിടെ ഒരു സീരിയല്‍ സംവിധായകനെ ചിലങ്ക തല്ലിയെന്ന വാര്‍ത്ത പുറത്തുവന്നിരുന്നു. ഇപ്പോഴിതാ സംഭവത്തെക്കുറിച്ചുള്ള കൂടുതല്‍ കാര്യങ്ങള്‍ ഒരു അഭിമുഖത്തില്‍ വ്യക്തമാക്കിയിരിക്കുകയാണ് നടി.
‘പത്ത് വര്‍ഷം കഴിഞ്ഞ് അന്ന് സംഭവിച്ച കാര്യങ്ങള്‍ തുറന്നുപറയുന്നതില്‍ അര്‍ത്ഥമില്ല. അപ്പോള്‍ തന്നെ പ്രതികരിച്ചയാളാണ് ഞാന്‍. കുറേ വര്‍ഷങ്ങള്‍ കഴിഞ്ഞ് പണ്ട് എനിക്ക് ഇതുപോലൊരു അനുഭവം ഉണ്ടായിട്ടുണ്ടെന്ന് പറയുന്നതിനോട് എനിക്ക് താല്‍പ്പര്യമില്ല. അമ്പതുപേരോളം വര്‍ക്ക് ചെയ്യുന്ന സീരിയലാണ്. ഞാന്‍ അന്ന് കേസുമായി മുന്നോട്ട് പോയിരുന്നുവെങ്കില്‍ അവരുടെയെല്ലാം ജോലിയെ അത് ബാധിച്ചേനെ.
പിന്നെ മോശം അനുഭവം ഉണ്ടായപ്പോള്‍ ഉടന്‍തന്നെ ഞാന്‍ പ്രതികരിച്ചു. ഈ വിഷയത്തില്‍ ലീഗലായി നീങ്ങിയാല്‍ എങ്ങനെയാണ് കാര്യങ്ങള്‍ മുന്നോട്ട് പോവുക എന്ന് എനിക്കറിയാമായിരുന്നു. അയാള്‍ക്ക് ഒരു കുടുംബം ഉണ്ടല്ലോ എന്നോര്‍ത്താണ് പ്രശ്നം വിട്ടത്. പക്ഷേ, എന്നെക്കുറിച്ച് അയാള്‍ പലരോടും പറഞ്ഞ് നടക്കാന്‍ തുടങ്ങിയപ്പോള്‍ ഞാനെന്തിന് സത്യം പറയാതിരിക്കണമെന്ന് തോന്നി. അയാളില്‍ നിന്നും പല തരത്തിലുള്ള സമീപനങ്ങളും ഉണ്ടായിട്ടുണ്ട്.
മോശം മെസേജുകള്‍ അയക്കുമായിരുന്നു. അതൊക്കെ ഞാന്‍ റിജക്ട് ചെയ്യാന്‍ തുടങ്ങിയപ്പോള്‍ മാനസികമായി പീഡിപ്പിക്കാന്‍ തുടങ്ങി. ഷേക്ക് ഹാന്റ് തരുമ്പോള്‍ അയാള്‍ കയ്യില്‍ ചൊറിയും. പബ്ലിക്കായി കളിയാക്കും. എന്നെക്കുറിച്ചും വീട്ടുകാരെക്കുറിച്ചും ശരീരഭാഗങ്ങള്‍ വച്ച് കമന്റുകള്‍ പറയും. ഇതേക്കുറിച്ച് സംസാരിക്കാന്‍ എന്റെ ഭര്‍ത്താവ് ഒരിക്കല്‍ സെറ്റില്‍ വന്നിരുന്നു. പക്ഷേ, കാര്യങ്ങള്‍ കൂടുതല്‍ വഷളാവുകയാണ് ചെയ്തത്.
ചാനല്‍ എനിക്കൊപ്പമാണ് നിന്നത്. സൗകര്യം ഇല്ലെങ്കില്‍ ഇറങ്ങിപ്പോടീ എന്ന് പറഞ്ഞ് ചീത്ത വിളിച്ചു. കേട്ടുകൊണ്ട് നില്‍ക്കാനുള്ള ക്ഷമയില്ലാത്തതുകൊണ്ടാണ് അടിച്ചത്. വളരെ മോശമായ ചീത്തയാണ് വിളിച്ചത്. തിരിച്ച് എന്നെയും ഉപദ്രവിച്ചു. മുഖത്തും കയ്യിലുമൊക്കെ മുറിവുകളുണ്ടായിരുന്നു ‘- ചിലങ്ക പറഞ്ഞു.
