തിരുവനന്തപുരം: കേരളത്തിന്റെ സ്വപ്നപദ്ധതിയായ വിഴിഞ്ഞം അന്താരാഷ്ട്ര തുറമുഖം രാജ്യത്തിന് സമര്പ്പിക്കുന്നതിനായി പ്രധാനമന്ത്രി നരേന്ദ്ര മോദി തിരുവനന്തപുരത്തെത്തി. വൈകീട്ട് ഏഴേമുക്കാലോടെയാണ് എയര് ഇന്ത്യ വിമാനത്തില് മോദി തിരുവനന്തപുരം വിമാനത്താവളത്തിലെത്തിയത്.
മുഖ്യമന്ത്രി പിണറായി വിജയന്, ചീഫ് സെക്രട്ടറി, ബിജെപിയുടെ സംസ്ഥാന നേതാക്കള് ഉള്പ്പെടെയുള്ളവര് അദ്ദേഹത്തെ സ്വീകരിച്ചു. പ്രധാനമന്ത്രിയെ കാണാനും അഭിവാദ്യം അര്പ്പിക്കാനും റോഡിന്റെ ഇരുവശത്തും ബിജെപി പ്രവര്ത്തകരും പൊതുജനങ്ങളും തിങ്ങിനിറഞ്ഞു. നഗരത്തിലെങ്ങും കനത്ത സുരക്ഷയാണ് ഏര്പ്പെടുത്തിയിരിക്കുന്നത്.
രാത്രി രാജ്ഭവനില് തങ്ങിയശേഷം വെള്ളിയാഴ്ച രാവിലെ 10.30-ന് മോദി വിഴിഞ്ഞത്തെത്തും. എംഎസ്സി സെലസ്റ്റിനോ മരസ്കാ എന്ന മദര്ഷിപ്പിനെ സ്വീകരിക്കും. തുടര്ന്ന് തുറമുഖം സന്ദര്ശിച്ചശേഷമായിരിക്കും പൊതുസമ്മേളനത്തില് പങ്കെടുക്കുക. പന്ത്രണ്ടോടെ മടങ്ങും.
ഗവര്ണര് രാജേന്ദ്ര അര്ലേക്കര്, മുഖ്യമന്ത്രി പിണറായി വിജയന്, കേന്ദ്രമന്ത്രിമാരായ സര്ബാനന്ദ സോനോവാള്, ജോര്ജ് കുര്യന്, സുരേഷ് ഗോപി, സംസ്ഥാന മന്ത്രിമാരായ വി.ശിവന്കുട്ടി, ജി.ആര്.അനില്, സജി ചെറിയാന്, എംപിമാരായ ശശി തരൂര്, അടൂര് പ്രകാശ്, എ.എ.റഹിം, എം.വിന്സന്റ് എംഎല്എ, മേയര് ആര്യ രാജേന്ദ്രന്, ഗൗതം അദാനി, കരണ് അദാനി, ബിജെപി സംസ്ഥാന പ്രസിഡന്റ് രാജീവ് ചന്ദ്രശേഖര് എന്നിവര് വേദിയിലുണ്ടാകും. പ്രതിപക്ഷനേതാവ് വി.ഡി.സതീശന്റെ പേരും ഉള്പ്പെടുത്തിയിട്ടുണ്ടെങ്കിലും അദ്ദേഹം പങ്കെടുക്കില്ല.
