തിരുവനന്തപുരം: 63-ാമത് സംസ്ഥാന സ്കൂള് കലോത്സവം ബഹിഷ്കരിച്ച് സര്ക്കാര് ഡോക്ടര്മാര്. 25 കലോത്സവ വേദികളിലും ഡോക്ടര്മാരുടെ സേവനം ലഭ്യമാകില്ല. കലോത്സവവുമായി സഹകരിക്കില്ലെന്ന് ഡോക്ടര്മാര് ഡിഎംഒയ്ക്ക് കത്ത് നല്കി.
ആര്യനാട് ആശുപത്രിയിലെ ഡോക്ടര്ക്കെതിരായ നടപടിയിലാണ് പ്രതിഷേധം. ഈ ഡോക്ടര് സ്വകാര്യ പ്രാക്റ്റീസ് നടത്തിയതിനെ തുടര്ന്ന് സസ്പെന്ഡ് ചെയ്യുകയും പിന്നീട് സ്ഥലം മാറ്റുകയും ചെയ്തിരുന്നു.
അതേസമയം, അഞ്ചു ദിവസം നീളുന്ന കൗമാര കലാമാമാങ്കത്തിന് തിരിതെളിഞ്ഞു. പ്രധാന വേദിയായ സെന്ട്രല് സ്റ്റേഡിയത്തില് രാവിലെ 9ന് പൊതുവിദ്യാഭ്യാസ ഡയറക്ടര് എസ്.ഷാനവാസ് പതാക ഉയര്ത്തി. ഒന്നാം വേദിയായ ‘എംടി നിള’യില് മുഖ്യമന്ത്രി പിണറായി വിജയന് സംസ്ഥാന സ്കൂള് കലോത്സവം ഉദ്ഘാടനം ചെയ്തു. വിദ്യാഭ്യാസമന്ത്രി വി.ശിവന്കുട്ടി അധ്യക്ഷനായിരുന്നു.
