കൊച്ചി: വെണ്ണലയില് അമ്മയുടെ മൃതദേഹം വീട്ടുമുറ്റത്ത് കുഴിച്ചിടാന് ശ്രമം. വെണ്ണല സ്വദേശിനി അല്ലി(72)യാണ് മരിച്ചത്. മകന് പ്രദീപിനെ പോലീസ് കസ്റ്റഡിയിലെടുത്തു. മൃതദേഹം വീട്ടുമുറ്റത്ത് കുഴിച്ചിടാന് ശ്രമിക്കുന്നതുകണ്ട നാട്ടുകാരാണ് വിവരം പോലീസില് അറിയിച്ചത്.
വ്യാഴാഴ്ച പുലര്ച്ചെ നാലുമണിയോടെയാണ് സംഭവം നാട്ടുകാര് കാണുന്നത്. ‘മദ്യലഹരിയിലായിരുന്നു പ്രദീപ്. യുവാവ് സ്ഥിരം മദ്യപാനിയാണ്. കുഴിയെടുക്കുന്നത് കണ്ടപ്പോഴാണ് സംഭവം അറിഞ്ഞത്. ഇന്നലെ പ്രദീപ് അമ്മയുമായി മരുന്ന് വാങ്ങാന് പുറത്ത് പോയിരുന്നു. പ്രദീപ് സ്ഥിരം മദ്യപിച്ച് വീട്ടില് പ്രശ്നമുണ്ടാക്കാറുണ്ട്. ബുധനാഴ്ച രാത്രിയും വീട്ടില് നിന്ന് ബഹളം കേട്ടിരുന്നു.’ നാട്ടുകാര് പറയുന്നു.
അമ്മ മരണപ്പെട്ടതിനെ തുടര്ന്ന് കുഴിച്ചിടുകയായിരുന്നു എന്നാണ് ഇയാള് പോലീസിനെ നല്കിയ മൊഴി. പാലാരിവട്ടം പോലീസ് മേല്നടപടികള് സ്വീകരിച്ചുവരികയാണ്.
