മുംബൈ: പ്രധാനമന്ത്രി പദവി വാഗ്ദാനവുമായി ഒരു മുതിര്‍ന്ന നേതാവ് തന്നെ സമീപിച്ചിരുന്നുവെന്ന് കേന്ദ്ര മന്ത്രി നിതിന്‍ ഗഡ്കരി. തനിക്ക് പ്രധാനമന്ത്രിയാകാന്‍ ആഗ്രഹമില്ലെന്ന് പറഞ്ഞ് ആ വാഗ്ദാനം നിരസിച്ചെന്നും അദ്ദേഹം വ്യക്തമാക്കി. നാഗ്പുരില്‍ നടന്ന ജേണലിസം അവര്‍ഡ് വിതരണ ചടങ്ങില്‍ സംസാരിക്കുകയായിരുന്നു അദ്ദേഹം.
പ്രധാനമന്ത്രിയാകണമെന്നൊരു ആഗ്രഹം തനിക്കില്ല. ഒരു പ്രത്യയശാസ്ത്രവും ബോധ്യവും പിന്തുടരുന്ന ആളാണ് താനെന്ന് ആ നേതാവിനോട് പറഞ്ഞു. സ്വപ്നത്തില്‍ പോലും വിചാരിക്കാത്തത് നല്‍കിയ പാര്‍ട്ടിയിലാണ് ഞാന്‍ ഇപ്പോഴുള്ളത്. ഒരു വാഗ്ദാനത്തിനും എന്നെ വശീകരിക്കാന്‍ കഴിയില്ലെന്നും ഗഡ്കരി പറഞ്ഞു. അതേസമയം, ആരാണ് ഗഡ്കരിയെ സമീപിച്ചതെന്നോ എന്നാണ് സംഭവമെന്നോ അദ്ദേഹം വെളിപ്പെടുത്തിയില്ല.
പത്രപ്രവര്‍ത്തനത്തിലും രാഷ്ട്രീയത്തിലും നൈതിക കാത്തുസൂക്ഷിക്കേണ്ടതിന്റെ പ്രാധാന്യവും ഗഡ്കരി ഓര്‍മിപ്പിച്ചു.
