മൈഗ്രേയ്ൻ എന്നാലെന്താണെന്നത് ഇന്ന് കുറെ പേർക്കെല്ലാം അറിയാവുന്നതാണ്. മൈഗ്രേയ്ൻ ഒരു തരത്തിലുള്ള തലവേദനയാണ്. എന്നാൽ സാധാരണഗതിയിൽ അനുഭവപ്പെടുന്ന തലവേദനകളിൽ നിന്ന് വ്യത്യസ്തമായി കഠിനമായതും ദീർഘമായി നിൽക്കുന്നതുമായ തലവേദനയാണ് മൈഗ്രേയ്ൻറെ പ്രത്യേകത. തലവേദന മാത്രമല്ല ഓക്കാനം, ചർദ്ദി, വെളിച്ചം കാണാനാകാത്ത അവസ്ഥ എന്നിങ്ങനെയുള്ള അനുബന്ധപ്രശ്നങ്ങളും മൈഗ്രേയ്നെ തീവ്രമാക്കുന്നു. മൈഗ്രേയ്ൻ ഉള്ളവരിൽ ഇടയ്ക്കിടെ ചില കാരണങ്ങൾ മൂലം ഇത് പുറത്തുവരികയാണ് ചെയ്യുന്നത്. എന്തെല്ലമാണ് ഇത്തരത്തിൽ മൈഗ്രേയ്നിലേക്ക് നയിക്കുന്നത് എന്ന് കണ്ടെത്തി കരുതലോടെ മുന്നോട്ട് പോയെങ്കിലേ മൈഗ്രേയ്നിൽ നിന്ന് രക്ഷ നേടാൻ സാധിക്കൂ. മൈഗ്രേയ്നിലേക്ക് നയിക്കുന്ന ഘടകങ്ങളിൽ ഭക്ഷണവുമായി ബന്ധപ്പെട്ട പ്രശ്നങ്ങളും അടങ്ങുന്നുണ്ട്. ഇതെക്കുറിച്ചാണിനി പങ്കുവയ്ക്കുന്നത്. ഭക്ഷണത്തിലെ ചില പോരായ്കകൾ- അല്ലെങ്കിൽ അശ്രദ്ധകൾ മൈഗ്രേയ്നിലേക്ക് നയിക്കുമെന്നാണെങ്കിൽ ഇവയെ നിയന്ത്രിക്കണമല്ലോ. ഇങ്ങനെ ഡയറ്റിൽ നിയന്ത്രിക്കേണ്ട കാര്യങ്ങളാണിവ…
ഒഴിവാക്കേണ്ട ഭക്ഷണങ്ങൾ…
ചില ഭക്ഷണങ്ങളോ വിഭവങ്ങളോ എല്ലാം മൈഗ്രേയ്നിലേക്ക് നയിക്കാം. എല്ലാ സന്ദർഭങ്ങളിലും ഉണ്ടാകണമെന്നില്ലെങ്കിൽ കൂടിയും ഇവ ഭീഷണി ഉയർത്താറുണ്ട്. കാപ്പി, ചീസ്, മദ്യം, ഗോതമ്പ്, പാലുത്പന്നങ്ങൾ എന്നിവയാണ് ഇതിൽ പ്രധാനപ്പെട്ടവ. ഇവയിലുള്ള ‘ടിരാമിൻ’ എന്ന അമിനോ ആസിഡ് ആണത്രേ മൈഗ്രേയ്ന് കാരണമാകുന്നത്. ഇവ കഴിച്ചതിന് പിന്നാലെ മൈഗ്രേയ്ൻ ഉണ്ടാകുന്നുവെങ്കിൽ പിന്നീട് ഇതിൽ ശ്രദ്ധ പുലർത്തുക.
ദഹനം…
ദഹനപ്രവർത്തനങ്ങൾ സുഗമമായി നടന്നെങ്കിൽ മാത്രമേ നമ്മുടെ ആരോഗ്യം ഭദ്രമാകൂ. അല്ലെങ്കിൽ പലവിധത്തിലുള്ള പ്രയാസങ്ങളും അസുഖങ്ങളുമെല്ലാം നാം നേരിടാം. ഇത്തരത്തിൽ ദഹനമില്ലായ്മ മൈഗ്രേയ്നിലേക്കും നയിക്കാം. ഇഅതിനാൽ മൈഗ്രേയ്ൻ പ്രശ്നമുള്ളവർ എപ്പോഴും ദഹനത്തിനും പ്രാധാന്യം നൽകണം.
ഭക്ഷണം ഒഴിവാക്കുന്നത്…
ദിവസത്തിൽ മൂന്നോ നാലോ നേരമാണ് നമ്മൾ പ്രധാനഭക്ഷണം കഴിക്കുന്നത്. ഇതിലേതെങ്കിലുമൊരു നേരം ഭക്ഷണം കഴിക്കാതിരുന്നാൽ അതും മൈഗ്രേയ്നിലേക്ക് നയിക്കാം. അതിനാൽ മൈഗ്രേയ്നുള്ളവർ ഭക്ഷണം ഒഴിവാക്കാതിരിക്കാനും ശ്രദ്ധിക്കുക.
മഗ്നീഷ്യം…
ചില പോഷകങ്ങളുടെ കുറവും മൈഗ്രേയ്നിലേക്ക് നയിക്കാം. മഗ്നീഷ്യം അത്തരത്തിലൊരു ഘടകമാണ്. അതിനാൽ മഗ്നീഷ്യം ആവശ്യത്തിന് ഭക്ഷണത്തിലൂടെ ഉറപ്പാക്കിയിരിക്കണം.
