തിരുവനന്തപുരം: കാട്ടാക്കടയില്‍ കൂറ്റന്‍ പുളിമരം കടപുഴകി വീണു. അപകടത്തില്‍നിന്ന് ഒറ്റയ്ക്ക് സ്ത്രീ രക്ഷപ്പെട്ടത് തലനാരിഴയ്ക്ക്. കാട്ടാക്കട മാര്‍ക്കറ്റ് റോഡില്‍ സിഎസ്ഐ പള്ളിക്ക് എതിര്‍വശത്ത് തയ്ക്കാ പള്ളിക്ക് സമീപമായുള്ള പുരയിടത്തില്‍ തകര ഷീറ്റുകള്‍ വെച്ചുകെട്ടി താമസിക്കുന്ന 56 കാരിയായ രമണിയാണ് അത്ഭുതകരമായി രക്ഷപ്പെട്ടത്.
ശനിയാഴ്ച രാത്രിയോടുകൂടി കനത്ത മഴയിലാണ് വന്‍പുളി മരം കടപുഴകിയത്. രമണി കിടന്നിരുന്ന വശത്ത് ചേര്‍ന്നാണ് പുളിമരം കടപുഴകിയത്. കട ഭാഗം മേല്‍ക്കൂര ഷീറ്റില്‍ അമര്‍ന്നുതാഴ്ന്നു. ഇതേ വശത്താണ് ഇവര്‍ കിടന്നിരുന്നത്. കനത്ത മഴയുടെ ശബ്ദത്തില്‍ എന്താണ് സംഭവിക്കുന്നതെന്ന് ഇവര്‍ അറിഞ്ഞിരുന്നില്ല.
തകര ഷീറ്റുകള്‍ അമര്‍ന്നുണ്ടായ ശബ്ദത്തില്‍ ഭയന്ന് ഞെട്ടി ഉണര്‍ന്ന് പുറത്തിറങ്ങാന്‍ കഴിയാതെ ഇവര്‍ ഇരുന്നു. പിന്നെ ധൈര്യം സംഭരിച്ച് തകര ഷീറ്റ് ശ്രമപെട്ട് മാറ്റിയാണ് പുറത്ത് കടന്ന് മറ്റുള്ളവരെ അറിയിച്ചത്. സമീപത്തെ പുരയിടത്തിലെ അഞ്ചോളം തെങ്ങും കൂറ്റന്‍ പുളിമരത്തിന് അടിയിലായി.
ഇലവ് മരം ഉള്‍പ്പെടെ അപകടാവസ്ഥയിലുള്ള വേറെ മരങ്ങളും സമീപത്തുണ്ട്. കെഎസ്ഇബി, പഞ്ചായത്ത്, താലൂക്ക് അധികൃതരെ വിവരം അറിയിച്ചു. മറ്റു ആശ്രയങ്ങള്‍ ഇല്ലാതെ ചുണ്ണാമ്പും ഉമിക്കരിയും വിറ്റ് ഉപജീവനം നടത്തുന്ന രമണിക്ക് ഇനി ഇതുപോലെയെങ്കിലും ഒരു താമസ സൗകര്യം ഉണ്ടാക്കി എടുക്കുക പ്രയാസമാണ്.
