കപ്പല്പടയ്ക്കു പിന്നാലെ ഖത്തറിലെ യുഎസ് താവളത്തില് മിസൈല് വിന്യാസം; മൊബൈല് ലോഞ്ചറുകളിലേക്ക് വന്തോതില് മിസൈലുകള് മാറ്റി അമേരിക്ക; മറ്റു താവളങ്ങളിലും വിമാനങ്ങളുടെ എണ്ണം കൂട്ടി; ഉപഗ്രഹ ചിത്രങ്ങള് പുറത്ത്; സമാധാന ചര്ച്ചകള് പൊളിഞ്ഞാല് യുദ്ധം?
അല്-ഉദൈദ്: ജനുവരി മുതല് ഇറാനുമായുള്ള സംഘര്ഷം വര്ദ്ധിച്ച പശ്ചാത്തലത്തില്, മിഡില് ഈസ്റ്റിലെ ഏറ്റവും വലിയ അമേരിക്കന് സൈനിക താവളമായ ഖത്തറിലെ അല്-ഉദൈദില് (al-Udeid) യുഎസ് സൈന്യം മിസൈലുകള് ട്രക്ക് ലോഞ്ചറുകളിലേക്ക് മാറ്റിയെന്നു റിപ്പോര്ട്ട്. ഉപഗ്രഹ ചിത്രങ്ങളുടെ വിശകലനത്തിലൂടെയാണ് ഈ നിര്ണ്ണായക വിവരങ്ങള് പുറത്തുവന്നത്. യുദ്ധമുണ്ടായാല് മിസൈലുകള് ഒരിടത്തുനിന്നു മറ്റൊരിടത്തേക്കു വേഗമെത്തിക്കാനാണു മൊബൈല് ലോഞ്ചറുകളിലേക്കു മാറ്റുന്നത്. നേരത്തേ, അമേരിക്ക കപ്പല്പടയെ അയച്ച് നാവിക വിന്യാസവും ശക്തമാക്കിയിരുന്നു.
പേട്രിയറ്റ് (Patriot) മിസൈലുകളെ സ്ഥിരമായ വിക്ഷേപണ തറകളില് (Launcher Stations) സൂക്ഷിക്കുന്നതിന് പകരം മൊബൈല് ട്രക്കുകളില് സജ്ജമാക്കിയത് വഴി, ഇറാനില്നിന്ന് ആക്രമണം ഉണ്ടായാല് വേഗത്തില് പ്രതിരോധിക്കാനോ തിരിച്ചടിക്കാനോ അമേരിക്കയ്ക്ക് സാധിക്കും. മേഖലയില് സംഘര്ഷം എത്രത്തോളം രൂക്ഷമാണെന്നാണ് ഈ നീക്കം സൂചിപ്പിക്കുന്നത്.
ഇറാന്റെ ആണവ-ബാലിസ്റ്റിക് മിസൈല് പദ്ധതികള്, പശ്ചിമേഷ്യയിലെ സായുധ ഗ്രൂപ്പുകള്ക്ക് നല്കുന്ന പിന്തുണ, ആഭ്യന്തര പ്രതിഷേധങ്ങളെ അടിച്ചമര്ത്തല് എന്നിവയുടെ പേരില് ഇറാനില് ബോംബ് ഇടാന് മടിക്കില്ലെന്ന് യുഎസ് പ്രസിഡന്റ് ഡൊണാള്ഡ് ട്രംപ് നേരത്തെ ഭീഷണിപ്പെടുത്തിയിരുന്നു. അതേസമയം, യുദ്ധം ഒഴിവാക്കാനായി ഒമാനില് വെച്ചുള്ള നയതന്ത്ര ചര്ച്ചകള് ഇപ്പോഴും തുടരുന്നുണ്ട്.
ഇറാഖ്, ജോര്ദാന്, കുവൈറ്റ്, സൗദി അറേബ്യ, ഖത്തര്, ബഹ്റൈന്, യുഎഇ, ഒമാന്, തുര്ക്കി എന്നിവിടങ്ങളിലും ഇന്ത്യന് മഹാസമുദ്രത്തിലെ ഡീഗോ ഗാര്സിയയിലും അമേരിക്കയ്ക്ക് സൈനിക താവളങ്ങളുണ്ട്. ഇറാന്റെ മണ്ണില് ഒരു ആക്രമണം ഉണ്ടായാല് ഏത് യുഎസ് താവളത്തിനെതിരെയും തങ്ങള് തിരിച്ചടിക്കുമെന്ന് ഇറാന് റവല്യൂഷണറി ഗാര്ഡ്സ് ഇതിനോടകം മുന്നറിയിപ്പ് നല്കിയിട്ടുണ്ട്.
ജനുവരിയിലെയും ഫെബ്രുവരി ആദ്യത്തെയും ഉപഗ്രഹ ചിത്രങ്ങള് താരതമ്യം ചെയ്യുമ്പോള് മേഖലയിലുടനീളം യുദ്ധവിമാനങ്ങളുടെയും മറ്റ് സൈനിക ഉപകരണങ്ങളുടെയും വലിയ വര്ദ്ധനവ് കാണാമെന്ന് ‘കോണ്ടെസ്റ്റഡ് ഗ്രൗണ്ട്’ (Contested Ground) എന്ന സ്ഥാപനത്തിലെ ഇമേജറി അനലിസ്റ്റ് വില്യം ഗുഡ്ഹിന്ദ് പറഞ്ഞു. ഫെബ്രുവരി ആദ്യം അല്-ഉദൈദില് പേട്രിയറ്റ് മിസൈലുകള് M983 ഹെവി എക്സ്പാന്ഡഡ് മൊബിലിറ്റി ടാക്റ്റിക്കല് ട്രക്കുകളില് (HEMTT) ഘടിപ്പിച്ച നിലയിലായിരുന്നുവെന്ന് അദ്ദേഹം വ്യക്തമാക്കി. ‘ഇത് പേട്രിയറ്റ് മിസൈലുകള്ക്ക് കൂടുതല് ചലനസ്വാതന്ത്ര്യം നല്കുന്നു. അതായത് അവ പെട്ടെന്ന് മറ്റൊരു സ്ഥലത്തേക്ക് മാറ്റാനോ തന്ത്രപരമായി പുനര്വിന്യസിക്കാനോ സാധിക്കും’ അദ്ദേഹം കൂട്ടിച്ചേര്ത്തു.
ചൊവ്വാഴ്ചയും മിസൈലുകള് ഈ ട്രക്കുകളില് തന്നെയാണോ എന്ന് വ്യക്തമല്ല. പെന്റഗണ് വക്താവ് ഇതുവരെ ഈ വിഷയത്തില് ഔദ്യോഗികമായി പ്രതികരിച്ചിട്ടില്ല. കഴിഞ്ഞ വേനല്ക്കാലത്ത് ഇസ്രായേല് ഇറാന്റെ ആണവ നിലയങ്ങളും സൈനിക കേന്ദ്രങ്ങളും ബോംബിട്ട് തകര്ത്ത രണ്ടാഴ്ചത്തെ സംഘര്ഷത്തിന് ശേഷം, തങ്ങളുടെ മിസൈല് ശേഖരം ഇറാന് കൂടുതല് ശക്തമാക്കിയിട്ടുണ്ട്. ടെഹ്റാന്, കെര്മാന്ഷാ, സെമ്നാന്, ഗള്ഫ് തീരം എന്നിവിടങ്ങളില് ഇറാന് ഭൂഗര്ഭ മിസൈല് കേന്ദ്രങ്ങളുണ്ട്.
ജനുവരി 27-നും ഫെബ്രുവരി 10-നും ഇറാനിയന് നേവല് ഡ്രോണ് കാരിയര് IRIS ഷാഹിദ് ബാഘേരി (IRIS Shahid Bagheri) ബന്ദര് അബ്ബാസിന് സമീപം കടലില് കാണപ്പെട്ടതായും ഉപഗ്രഹ ചിത്രങ്ങള് സൂചിപ്പിക്കുന്നു.
ഉപഗ്രഹ ചിത്രങ്ങളില് കണ്ടെത്തിയ പ്രധാന മാറ്റങ്ങള്:
അല്-ഉദൈദ്, ഖത്തര്: ഫെബ്രുവരി 1-ലെ ചിത്രങ്ങളില് ഒരു RC-135 നിരീക്ഷണ വിമാനം, മൂന്ന് C-130 ഹെര്ക്കുലീസ് വിമാനങ്ങള്, 18 KC 135 സ്ട്രാറ്റോടാങ്കറുകള്, ഏഴ് C-17 വിമാനങ്ങള് എന്നിവ കണ്ടെത്തി. ജനുവരി 17-ന് ഉണ്ടായിരുന്നതിനേക്കാള് വലിയ വര്ദ്ധനവാണിത്. കൂടാതെ 10 MIM-104 പേട്രിയറ്റ് വ്യോമ പ്രതിരോധ സംവിധാനങ്ങള് മൊബൈല് ട്രക്കുകളില് സജ്ജമാക്കിയിട്ടുണ്ട്.
മുവാഫഖ്, ജോര്ദാന്: ഫെബ്രുവരി 2-ലെ ചിത്രങ്ങളില് 17 F15-E സ്ട്രൈക്ക് വിമാനങ്ങള്, 8 A-10 തണ്ടര്ബോള്ട്ട് വിമാനങ്ങള്, നാല് C-130 വിമാനങ്ങള് എന്നിവ കണ്ടെത്തി. കൂടാതെ EA-18G ഗ്രൗളര് (Growler) എന്ന ഇലക്ട്രോണിക് വാര്ഫെയര് വിമാനങ്ങളും ഇവിടെ വിന്യസിച്ചിട്ടുണ്ട്.
മറ്റ് താവളങ്ങള്: സൗദി അറേബ്യയിലെ പ്രിന്സ് സുല്ത്താന് താവളത്തിലും ഇന്ത്യന് മഹാസമുദ്രത്തിലെ ഡീഗോ ഗാര്സിയയിലും ഒമാനിലെ ദുഖാന് താവളത്തിലും വിമാനങ്ങളുടെ എണ്ണത്തില് വലിയ വര്ദ്ധനവ് രേഖപ്പെടുത്തിയിട്ടുണ്ട്.
