കാസര്‍കോട്: നാലുപതിറ്റാണ്ടിന്റെ മുറവിളികള്‍ക്കൊടുവില്‍ പരശുറാം എക്സ്പ്രസിന് ചെറുവത്തൂരില്‍ സ്റ്റോപ്പ് അനുവദിച്ച് റെയില്‍വേ. ഏറ്റവും അനുയോജ്യമായ ദിവസം മുതല്‍ 16649/16650 മംഗളൂരു-നാഗര്‍കോവില്‍ പരശുറാം എക്സ്പ്രസ് ചെറുവത്തൂരില്‍ നിര്‍ത്തുമെന്ന് റെയില്‍വേ ബോര്‍ഡ് ജോയിന്റ് ഡയറക്ടര്‍ വിവേക് കുമാര്‍ സിന്‍ഹയാണ് ഉത്തരവിറക്കിയത്. പരശുറാം എക്സ്പ്രസ് സര്‍വീസ് തുടങ്ങിയകാലം മുതലുള്ള ആവശ്യം റെയില്‍വേ പരിഗണിച്ചതിലുള്ള ആഹ്ലാദത്തിലാണ് ചെറുവത്തൂരിലേയും സമീപ പഞ്ചായത്തുകളിലെയും യാത്രക്കാര്‍.
ഇവിടങ്ങളിലെ ദീര്‍ഘദൂര യാത്രക്കാര്‍ക്കാണ് വലിയ ആശ്വാസം. രാവിലെ 6.22 നും വൈകുന്നേരം 7.17 നുമാണ് പരശു ചെറുവത്തൂരിലെത്തുക. രാവിലെ കണ്ണൂര്‍, കോഴിക്കോട് ഭാഗത്തേക്ക് സര്‍ക്കാര്‍ ഓഫീസുകളിലും മറ്റിതര ജോലിക്കും ആശുപത്രികളിലേക്കും പോകുന്നവര്‍ക്ക് ആശ്വസാമാകും. വൈകുന്നേരം കോയമ്പത്തൂര്‍ – മംഗളൂരു പാസഞ്ചറിന് ശേഷം മംഗളൂരു ഭാഗത്തേക്ക് മറ്റൊരു വണ്ടിയില്ലാത്ത സാഹചര്യത്തില്‍ തിരിച്ചുള്ള യാത്രയ്ക്കും ഏറെ സഹായമാകും. ചെറുവത്തൂര്‍, പിലിക്കോട്, വലിയപറമ്പ, കയ്യൂര്‍ – ചീമേനി, പടന്ന, കരിവെള്ളൂര്‍ – പെരളം, കാങ്കോല്‍ – ആലപ്പടമ്പ് പഞ്ചായത്തുകളിലെ യാത്രക്കാര്‍ പ്രധാനമായും ആശ്രയിക്കുന്ന സ്റ്റേഷനാണ് ചെറുവത്തൂര്‍.
രാവിലെ തെക്കോട്ടുള്ള യാത്രയ്ക്ക് പയ്യന്നൂര്‍, നീലേശ്വരം റെയില്‍വേ സ്റ്റേഷനുകളെ ആശ്രയിച്ചാണ് ഇപ്പോഴത്തെ യാത്ര. 6.15 ന് നീലേശ്വരത്തെത്തും 6.30 ഓടെ പയ്യന്നൂരിലുമെത്തുന്ന പരശൂറാം എക്സ്പ്രസിലെ യാത്രയ്ക്ക് അതിരാവിലെ പുറപ്പെടണം. ചെറുവത്തൂരില്‍ പരശുറാം നിര്‍ത്തുന്നതോടെ സമയവും പണവും ലാഭമാകും. നാലുപതിറ്റാണ്ടപ്പുറത്ത് തുടങ്ങിയതാണ് പരശുറാം എക്സ്പ്രസിന് ചെറുവത്തൂരില്‍ സ്റ്റോപ് അനുവദിക്കാനുള്ള സമര പ്രക്ഷോഭങ്ങള്‍. സ്വാതന്ത്ര്യദിന സമ്മാനമായി നേരത്തെ തന്നെ കാസര്‍കോടിന് ഏതാനും ട്രെയിനുകള്‍ക്ക് സ്റ്റോപ് അനുവദിച്ച് റെയില്‍വേ പ്രഖ്യാപനം നടത്തിയിരുന്നു. കോഴിക്കോടിനും മംഗളൂരുവിനുമിടയില്‍ ദീര്‍ഘദൂര ട്രെയിനായ തിരുനെല്‍വേലി ഗാന്ധിധാം – തിരുനെല്‍വേലി ഹംസഫര്‍ എക്സ്പ്രസിന് (20923/924) കാസര്‍കോട് സ്റ്റോപ് നല്‍കിയിരുന്നു.
വ്യാഴാഴ്ച മുതല്‍ കാസര്‍കോട് ഈ ട്രെയിന്‍ നിര്‍ത്തും. പ്രഖ്യാപനത്തില്‍ കണ്ണൂരിലും ഹംസഫറിന് സ്റ്റോപ്പ് നല്‍കിയിട്ടുണ്ട്. കൂടാതെ, ട്രെയിന്‍ നമ്പര്‍ 22629/22630 ദാദര്‍ – തിരുനെല്‍വേലി ദാദര്‍ സ്‌പ്രെസിനും കാസര്‍കോട് സ്റ്റോപ്പ് അനുവദിച്ചു. ഇന്നുമുതല്‍ ഈ വണ്ടിയും കാസര്‍കോട് നിര്‍ത്താന്‍ തുടങ്ങിയിരുന്നു. ഇതിനുപുറമേ, കണ്ണൂര്‍ ജില്ലയില്‍ ട്രെയിന്‍ നമ്പര്‍ 16347/16348 തിരുവനന്തപുരം മംഗലാപുരം തിരുവനന്തപുരം എക്സ്പ്രസിന് 17 മുതല്‍ ഏഴിമല സ്റ്റേഷനിലും 15 മുതല്‍ ട്രെയിന്‍ നമ്പര്‍ 16605/16606 ഏറനാട് എക്സ്പ്രസിന് പഴയങ്ങാടി റെയില്‍വേ സ്റ്റേഷനിലും സ്റ്റോപ് അനുവദിച്ചിരുന്നു.
റെയില്‍വേയുടെ തുടക്കം മുതല്‍ വെള്ളം നല്‍കിയ (വാട്ടറിങ് സ്റ്റേഷന്‍) സ്റ്റേഷനായിരുന്ന ചെറുവത്തൂരില്‍ അക്കാലത്ത് തീവണ്ടികളെല്ലാം നിര്‍ത്തുമായിരുന്നു. ഡീസല്‍ വണ്ടിക്ക് കല്‍ക്കരിവണ്ടി വഴിമാറിയതോടെ സ്റ്റോപ്പുകള്‍ ഓരോന്നായി ഇല്ലാതാവുകയായിരുന്നു. അന്ന് വെള്ളം നല്‍കിയ ചെറുവത്തൂര്‍ ഇന്ന് വൈദ്യുതി കൊടുക്കുന്നുണ്ട്. എന്നാലതിന്റെ പരിഗണന ചെറുവത്തൂരിന് കിട്ടിയിരുന്നില്ല.
പരശുറാം എക്സ്പ്രസിന് ചെറുവത്തൂരില്‍ ‘സ്റ്റോപ്പ്’ പരിഗണനയിലെന്ന് പി.കരുണാകരന്‍ എംപിയായിരുന്ന കാലയളവില്‍ തന്നെ പലപ്പോഴായി കേട്ടിരുന്നു. പിന്നീട്, രാജ്‌മോഹന്‍ ഉണ്ണിത്താന്‍ എംപിയായി ആദ്യമെത്തിയപ്പോഴും പരശുറാം എക്സ്പ്രസിന് ചെറുവത്തൂരില്‍ സ്റ്റോപ്പില്ലാത്തതിനെ കുറിച്ച് തന്നെയായിരുന്നു പറഞ്ഞിരുന്നത്. എന്നാല്‍, ഏറെ കാലത്തെ കാത്തിരിപ്പിനും മുറവിളിക്കുമൊടുവില്‍ പരശുറാം ചെറുവത്തൂരില്‍ നിര്‍ത്താന്‍ പോവുകയാണ്.
