ധ്യാൻ ശ്രീനിവാസനെ നായകനാക്കി സക്കീർ മഠത്തിൽ സംവിധാനം ചെയ്ത ജയിലർ എന്ന ചിത്രത്തിൻറെ ട്രെയ്‍ലർ പുറത്തെത്തി. പിരീഡ് ത്രില്ലർ വിഭാഗത്തിൽ പെടുന്ന ചിത്രം 1956-57 കാലഘട്ടത്തിൽ നടന്ന ഒരു സംഭവകഥയാണ് പറയുന്നതെന്ന് അണിയറക്കാർ അറിയിച്ചിരുന്നു. പേര് സൂചിപ്പിക്കുന്നത് പോലെ ഒരു ജയിലറുടെ വേഷത്തിലാണ് നായകനായ ധ്യാൻ എത്തുന്നത്. അഞ്ച് കൊടും കുറ്റവാളികളുടെ കൂടെ ഒരു ബംഗ്ലാവിൽ താമസിച്ച് അവരെ വെച്ച് പുതിയൊരു പരീക്ഷണത്തിന് ശ്രമിക്കുന്ന ജയിലർ ആണ് ധ്യാൻ അവതരിപ്പിക്കുന്ന കഥാപാത്രം.
ഗോൾഡൻ വില്ലേജിൻ്റെ ബാനറിൽ എൻ കെ മുഹമ്മദ് ആണ് ചിത്രത്തിൻറെ നിർമ്മാണം. ദിവ്യ പിള്ള നായികയായി എത്തുന്ന ഈ ചിത്രത്തിൽ മനോജ് കെ ജയൻ, ശ്രീജിത്ത് രവി, നവാസ് വള്ളിക്കുന്ന്, ബിനു അടിമാലി, ഉണ്ണി രാജ, ജയപ്രകാശ്, ബി കെ ബൈജു, ശശാങ്കൻ, ടിജു മാത്യു, ശാന്തകുമാരി, ആൻസി വിനീഷ, ബാല താരങ്ങളായ വാസുദേവ് സജീഷ് മരാർ, സൂര്യദേവ് സജീഷ് മാരാർ തുടങ്ങിയവരും അഭിനയിച്ചിരിക്കുന്നു.
ജയിലർ എന്ന ടൈറ്റിലിനെച്ചൊല്ലിയുള്ള തർക്കത്തിൻറെ പേരിലും ഈ ചിത്രം അടുത്തിടെ വാർത്തകളിൽ നിറഞ്ഞിരുന്നു. രജനികാന്തിനെ നായകനാക്കി നെൽസൺ ദിലീപ്‍കുമാർ സംവിധാനം ചെയ്ത്, വരാനിരിക്കുന്ന തമിഴ് ചിത്രത്തിൻറെ പേരും ജയിലർ എന്നാണ്. ഇത് ചൂണ്ടിക്കാട്ടിക്കൊണ്ട് തമിഴ് ചിത്രത്തിൻറെ നിർമ്മാതാക്കളായ സൺ പിക്ചേഴ്സിന് മലയാള ചിത്രത്തിൻറെ അണിയറക്കാർ നോട്ടീസ് അയച്ചിരുന്നു. എന്നാൽ തങ്ങൾക്ക് പേര് മാറ്റാൻ പറ്റില്ലെന്നാണ് സൺ പിക്ചേഴ്സ് അറിയിച്ചിരിക്കുന്നത്. ഇത് സംബന്ധിച്ച് മലയാള ചിത്രത്തിൻറെ അണിയറക്കാർ മദ്രാസ് ഹൈക്കോടതിയിൽ സമർപ്പിച്ചിരിക്കുന്ന വക്കാലത്ത് ഓഗസ്റ്റ് 2 ന് പരിഗണിക്കും. അതേസമയം തമിഴ് ജയിലറിൻറെ റിലീസ് തീയതി ഓഗസ്റ്റ് 10 ആണ്.
