BusinessTRENDING

വമ്പൻ ഓഫറുകളുമായി ജനപ്രിയ വാഹന ബ്രാൻഡായ ടാറ്റ

ജൂൺ മാസത്തിൽ കിടിലൻ ഓഫറുകൾ പ്രഖ്യാപിച്ച് ജനപ്രിയ വാഹന ബ്രാൻഡായ ടാറ്റ മോട്ടോഴ്സ്. തിരഞ്ഞെടുത്ത മോഡലുകൾക്ക് മികച്ച ഡിസ്‌കൗണ്ടുകളാണ് ടാറ്റ ജൂണിൽ വാഗ്ദാനം ചെയ്യുന്നത്. ക്യാഷ് ഡിസ്‌കൗണ്ട്, എക്‌സ്‌ചേഞ്ച് ബോണസ്, കോർപറേറ്റ് ബെനഫിറ്റ് എന്നിവയുടെ രൂപത്തിലാണ് ആനുകൂല്യങ്ങൾ ലഭിക്കുക. എന്നാൽ ഇലക്ട്രിക്ക് ​മോഡലുകൾക്ക് ഓഫറുകളൊന്നും കമ്പനി പ്രഖ്യാപിച്ചിട്ടില്ല.

ടാറ്റ ടിയാഗോ 53,000 രൂപ വരെ

ടിയാഗോയുടെ സിഎൻജി മോഡലുകൾക്ക് 30,000 രൂപയും പെട്രോൾ വേരിയന്റുകൾക്ക് 20,000 രൂപയുമാണ് ടാറ്റ ക്യാഷ് ഡിസ്‌കൗണ്ട് നൽകുന്നത്. എല്ലാ വേരിയന്റുകൾക്കും 10,000 രൂപ എക്‌സചേഞ്ച് ബോണസ് ലഭിക്കും. അഡീഷനൽ എക്‌സ്‌ചേഞ്ച് ബോണസായ 10,000 രൂപയും കോർപറേറ്റ് ഡിസ്‌കൗണ്ടായ 3,000 രൂപയും ചേർത്ത് മൊത്തം 53,000 രൂപ വരെ ആനുകൂല്യത്തിൽ ടിയാഗോ സ്വന്തമാക്കാം. 5.60 ലക്ഷം രൂപ മുതൽ 8.11 ലക്ഷം രൂപ വരെയാണ് ടിയാഗോയുടെ എക്‌സ്‌ഷോറൂം വില. ടിയാഗോ ഹാച്ച്ബാക്ക് ഒന്നിലധികം പവർട്രെയിനുകളിൽ ലഭ്യമാണ്, മാരുതി സുസുക്കി സ്വിഫ്റ്റ് , മാരുതി സുസുക്കി ഇഗ്നിസ് , ഹ്യുണ്ടായ് ഗ്രാൻഡ് i10 നിയോസ് എന്നിവയെ നേരിടുന്നു.

ടാറ്റ ടിഗോർ 58,000 രൂപ വരെ

ടാറ്റ ടിഗോറിന്റെ പെട്രോൾ മോഡലുകൾക്ക് മൊത്തം 33,000 രൂപ വരെ കിഴിവ് വാഗ്ദാനം ചെയ്യുന്നു, അതേസമയം സിഎൻജി മോഡലുകൾക്ക് 48,000 രൂപ വരെ കിഴിവുകൾ നൽകുന്നു. എക്‌സ്‌ചേഞ്ച് ഡിസ്‌കൗണ്ടുകൾ, ഉപഭോക്തൃ സ്‌കീമുകൾ, കോർപ്പറേറ്റ് ഡിസ്‌കൗണ്ടുകൾ എന്നിവ രണ്ട് മോഡലുകളുടെയും ഡിസ്‌കൗണ്ടുകളിൽ ഉൾപ്പെടുന്നു. മൊത്തം 58,000 രൂപ വരെ ഡിസ്‌കൗണ്ടിലാണ് ഈ മാസം ടിഗോർ വാങ്ങാൻ സാധിക്കുക. 6.30 ലക്ഷം മുതൽ 8.90 ലക്ഷം രൂപ വരെയാണ് ടിഗോറിന്റെ എക്‌സ്‌ഷോറൂം വില.

ടാറ്റ ആൾട്രോസ് 30,000 രൂപ വരെ

ടാറ്റ മോട്ടോഴ്‌സ് തങ്ങളുടെ ജനപ്രിയ ആൾട്രോസ് ഹാച്ച്ബാക്കിന്റെ പെട്രോൾ, ഡീസൽ മോഡലുകൾക്ക് കിഴിവ് വാഗ്ദാനം ചെയ്യുന്നു. അടുത്തിടെ പുറത്തിറക്കിയ ആൾട്രോസ് സിഎൻജിക്ക് കിഴിവുകളൊന്നും ലഭിക്കുന്നില്ല. XE, XE+ എന്നിവ ഒഴികെയുള്ള പെട്രോൾ വേരിയന്റുകൾക്ക് മൊത്തം 25,000 രൂപ വരെ കിഴിവ് ലഭിക്കും, അതേസമയം XE, XE+ ട്രിമ്മുകൾക്ക് 10,000 രൂപ വരെ കിഴിവ് ലഭിക്കും. എല്ലാ ഡീസൽ വേരിയന്റുകളിലും 30,000 രൂപ വരെ കിഴിവ് ലഭിക്കും. 6.60 ലക്ഷം മുതൽ 10.74 ലക്ഷം വരെയാണ് പ്രീമിയം ഹാച്ചിന്റെ എക്‌സ്‌ഷോറൂം വില.

ടാറ്റ ഹാരിയറും സഫാരിയും 35,000 രൂപ വരെ

ടാറ്റയുടെ ഹാരിയർ, സഫാരി എസ്‌യുവികൾക്ക് പരമാവധി 35,000 രൂപ വരെ ആനുകൂല്യങ്ങൾ ലഭിക്കും. രണ്ട് എസ്‌യുവികൾക്കും 25,000 രൂപ വരെ എക്‌സ്‌ചേഞ്ച് ഡിസ്‌കൗണ്ടും എല്ലാ വേരിയന്റുകളിലും ബാധകമായ 10,000 രൂപ വരെ കോർപ്പറേറ്റ് കിഴിവുമുണ്ട്.

ഓഫർ ഇല്ലാത്തവ

ഹാരിയറിലോ സഫാരിയിലോ ഉപഭോക്തൃ ആനുകൂല്യ പദ്ധതികളൊന്നുമില്ല. ജനപ്രിയ മോഡലായ നെക്‌സോണിനും ടാറ്റ ക്യാഷ് ഡിസ്‌കൗണ്ട് ഓഫർ ചെയ്യുന്നില്ല. 15,000 രൂപ അഡീഷനൽ എക്‌സ്‌ചേഞ്ച് ബോണസ്, 5000 രൂപ കോർപറേറ്റ് ഡിസ്‌കൗണ്ട് എന്നിവ സഹിതം മൊത്തം 20,000 ആനുകൂല്യത്തിൽ നെക്‌സോൺ എസ്‌യുവിയുടെ ഡീസൽ വേരിയന്റുകൾ ജൂണിൽ സ്വന്തമാക്കാം. അതേസമയം പെട്രോൾ വേരിയന്റുകൾക്ക് 10,000 രൂപ മാത്രമായിരിക്കും എക്‌സ്‌ചേഞ്ച് ബോണസായി ലഭിക്കുക. 7.80 ലക്ഷം മുതൽ 14.35 ലക്ഷം രൂപ വരെയാണ് നെക്‌സോണിന്റെ വില. ജൂൺ 20 വരെ വാങ്ങുന്നവർക്ക് മാത്രമായിരിക്കും അഡീഷനൽ എക്‌സ്‌ചേഞ്ച് ആനുകൂല്യം ലഭ്യമാകുക.

നിരാകരണം: ഈ ഓഫറുകൾ വിവിധ നഗരങ്ങൾക്കനുസരിച്ച് വ്യത്യാസപ്പെടും. അതായത് നിങ്ങളുടെ നഗരത്തെയും സംസ്ഥാനത്തെയും ആശ്രയിച്ച് മുകളിൽ സൂചിപ്പിച്ച ഓഫറുകൾ വ്യത്യാസപ്പെടാം. എല്ലാ വിലകളും എക്സ്ഷോറൂം ആണ്. കോർപ്പറേറ്റ് ഓഫറുകൾ വ്യത്യസ്ത ഗ്രൂപ്പുകൾക്കിടയിൽ വ്യത്യാസപ്പെടുന്നു. അതിനാൽ, കൂടുതൽ വിവരങ്ങൾക്ക് നിങ്ങളുടെ അടുത്തുള്ള ടാറ്റ ഡീലർഷിപ്പുമായി ബന്ധപ്പെടുക.

Back to top button
error: