സ്വന്തം സഹോദരി ഫ്ളൈറ്റ് അറ്റന്‍ഡന്റായി ജോലി ചെയ്യുന്ന വിമാനത്തില്‍ യാത്രക്കാരനായി സഹോദരനും എത്തിയാല്‍ യാത്ര ഇരട്ടിമധുരമായിരിക്കും അല്ലേ? ഇത്തരമൊരു വീഡിയോയാണ് സോഷ്യല്‍ മീഡിയയില്‍ കഴിഞ്ഞ ദിവസങ്ങളില്‍ തകര്‍ത്തോടുന്നത്.
View this post on Instagram
സൈനികനായ ഷെം എന്ന യുവാവ് ഇന്‍സ്റ്റഗ്രാമില്‍ പങ്കുവെച്ച വീഡിയോയാണ് അനേകര്‍ ഏറ്റെടുക്കുന്നത്. ഇദ്ദേഹം വിമാനത്തില്‍ കയറി തനിക്ക് അനുവദിച്ച സീറ്റില്‍ ഇരിക്കുന്നത് മുതലാണ് വീഡിയോ ആരംഭിക്കുന്നത്. തുടര്‍ന്ന് സഹോദരി എയര്‍ ഹോസ്റ്റസ് വേഷത്തില്‍നിന്ന് സുരക്ഷാ അനൗണ്‍സ്മെന്റുകള്‍ നല്‍കുന്നതും യാത്രക്കാര്‍ക്ക് സൗകര്യങ്ങള്‍ ഒരുക്കിനല്‍കുന്നതുമെല്ലാം ഇയാള്‍ ക്യാമറയില്‍ പകര്‍ത്തി. യാത്രയിലുടനീളം ഇരുവരും അങ്ങോട്ടുമിങ്ങോട്ടും നോക്കി പുഞ്ചിരിക്കുന്നതും വീഡിയോയില്‍ കാണാം. ഒടുവില്‍ യാത്ര അവസാനിക്കാറായപ്പോള്‍ ഇയാള്‍ സഹോദരിയോടും മറ്റ് ഫ്ളൈറ്റ് അറ്റന്‍ഡര്‍മാരോടുമൊപ്പം ഫോട്ടോയെടുക്കുകയും ചെയ്തു.
”ഫ്ളൈറ്റ് അറ്റന്‍ഡറായി സ്വന്തം സഹോദരി എത്തിയാല്‍” എന്ന അടിക്കുറിപ്പോടെയാണ് വീഡിയോ പങ്കുവെച്ചത്. ഏപ്രില്‍ 22 ന് ഷെയര്‍ ചെയ്ത ഈ വീഡിയോയ്ക്ക് 1 കോടി 70 ലക്ഷം കാഴ്ച്ചക്കാരെയും ഒരു കോടി ലൈക്കുകളും ഇതിനോടകം ലഭിച്ചു. ധാരാളം പേര്‍ വീഡിയോയ്ക്ക് കമന്റുകളുമായി എത്തി.
