ബെന്‍സി പ്രൊഡക്ഷന്‍സിന്റെ ബാനറില്‍ കെ വി അബ്ദുള്‍ നാസര്‍ നിര്‍മ്മിച്ച് ആശ ശരത്ത് പ്രധാന വേഷത്തിലെത്തുന്ന ഖെദ്ദ തീയേറ്ററുകളിലേക്ക്. ഡിസംബര്‍ 2 ന് ചിത്രം തിയേറ്ററുകളില്‍ എത്തും. ആശ ശരത്തും മകള്‍ ഉത്തര ശരത്തും പ്രധാന വേഷങ്ങളില്‍ എത്തുന്ന സിനിമയെന്ന നിലയില്‍ നേരത്തെ തന്നെ ശ്രദ്ധ നേടിയ സിനിമ ആയിരുന്നു ഖെദ്ദ.
ഒരു സമ്പൂർണ കുടുംബ ചിത്രമായാണ് ഖെദ്ദയെ ഒരുക്കിയിരിക്കുന്നതെന്ന് സിനിമയുടെ പുറത്തിറങ്ങിയ ട്രൈലെറില്‍ നിന്നും ഗാനത്തില്‍ നിന്നും മനസിലാക്കാന്‍ കഴിയും. അമ്മ- മകള്‍, ഭാര്യ- ഭര്‍തൃ ബന്ധങ്ങള്‍ക്ക് പ്രാധാന്യം നല്‍കുന്നതാണ് സിനിമയുടെ കഥയുതിരക്കഥയും. ആശ ശരത്തിനും ഉത്തരക്കും പുറമെ സുദേവ് നായര്‍, സുധീര്‍ കരമന, ജോളി ചിറയത്ത്, സരയു എന്നിവരും ചിത്രത്തിൽ പ്രധാന വേഷങ്ങളില്‍ എത്തുന്നു.
മനോജ് കാനയാണ് സിനിമയുടെ സംവിധായകന്‍. തിരക്കഥയും അദ്ദേഹത്തിന്റെത് തന്നെ. പ്രതാപ് പി നായര്‍ കാമറ കൈകാര്യം ചെയ്യുന്നു. ബിജിപാലിന്റേതാണ് ആണ് പശ്ചാത്തല സംഗീതം. ശ്രീവത്സന്‍ ജെ മേനോനാണ് സംഗീതം ഒരുക്കുന്നത്. ഗാനങ്ങൾ-മനോജ് കുറൂർ. ഒരുത്തി, ഓട്ടോറിക്ഷക്കാരന്റെ ഭാര്യ പോലുള്ള ശ്രദ്ധേയമായ സിനിമകള്‍ക്ക് ശേഷം ബെന്‍സി പ്രൊഡക്ഷന്‍സിന്റെ ബാനറിലെത്തുന്ന ചിത്രമെന്ന പ്രേത്യേകതയും സിനിമയ്ക്കുണ്ട്. ചിത്രം തിയേറ്ററുകളില്‍ എത്തിക്കുന്നതും ബെന്‍സി പ്രൊഡക്ഷന്‍സ് തന്നെ.
