ന്യൂഡൽഹി: കേരളം, തമിഴ്നാട്, പശ്ചിമ ബംഗാൾ എന്നീ സംസ്ഥാനങ്ങളിലെയും കേന്ദ്രഭരണ പ്രദേശമായ പുതുച്ചേരിയിലെയും നിയമസഭാ തിരഞ്ഞെടുപ്പിന്റെ ആദ്യഘട്ട ഫലസൂചനകൾ രാഷ്ട്രീയഭൂപടത്തിൽ വലിയ മാറ്റങ്ങൾ സൂചിപ്പിക്കുന്നു. ഭരണകക്ഷികളോട് ജനങ്ങൾക്കിടയിൽ ശക്തമായ വിരുദ്ധവികാരം നിലനിൽക്കുന്നതിന്റെ വ്യക്തമായ അടയാളങ്ങളാണ് ആദ്യ ലീഡ് നിലകൾ നൽകുന്നത്.
കേരളത്തിൽ തുടക്കത്തിൽ തന്നെ വൻ മുന്നേറ്റമാണ് യുഡിഎഫ് കാഴ്ചവച്ചത്. എൽഡിഎഫിന്റെ പരമ്പരാഗത കോട്ടകളിൽ പോലും യുഡിഎഫ് ലീഡ് പിടിക്കുന്ന കാഴ്ചയാണ് വിവിധ മണ്ഡലങ്ങളിൽ പ്രത്യക്ഷപ്പെടുന്നത്. ഇടതുവിരുദ്ധ തരംഗം രൂപപ്പെടുന്നതായാണ് സൂചന. നിരവധി മന്ത്രിമാരടക്കമുള്ള പ്രമുഖർ പിന്നിലായതും ശ്രദ്ധേയമാണ്. ധർമ്മടം മണ്ഡലത്തിൽ ആദ്യ ആറു റൗണ്ടുകൾ കഴിഞ്ഞപ്പോൾ മുഖ്യമന്ത്രി പിണറായി വിജയൻ പിന്നിലായിരുന്നുവെങ്കിലും, തുടർന്ന് നടന്ന ഏഴാം റൗണ്ടിൽ ലീഡ് തിരിച്ചുപിടിച്ചു.
തമിഴ്നാട്ടിൽ അതിശയിപ്പിക്കുന്ന രാഷ്ട്രീയ മാറ്റസൂചനകളാണ് പുറത്തുവരുന്നത്. ഭരണകക്ഷിയായ ഡിഎംകെ നയിക്കുന്ന മുന്നണി മൂന്നാംസ്ഥാനത്തേക്ക് പിന്തള്ളപ്പെട്ടിരിക്കുകയാണ്. ആദ്യമായി രാഷ്ട്രീയരംഗത്തിറങ്ങിയ നടൻ വിജയ് നയിക്കുന്ന തമിഴക വെട്രി കഴകം (ടിവികെ) ശക്തമായ മുന്നേറ്റം നടത്തി ഏറ്റവും വലിയ ഒറ്റക്കക്ഷിയായി ഉയരുന്ന കാഴ്ചയാണ്. ഏകദേശം നൂറോളം സീറ്റുകളിൽ ടിവികെ ലീഡ് നിലയിലാണ്. കമൽഹാസനുപോലും സൃഷ്ടിക്കാനാവാതെ പോയ തരംഗം വിജയ്ക്ക് കന്നിയങ്കത്തിൽ തന്നെ നിഷ്പ്രയാസം സാധ്യമായെന്നത് ശ്രദ്ധേയം. എഐഡിഎംകെ മുന്നണി രണ്ടാമതും, ഡിഎംകെ ഏറെ പിന്നിലുമായി നിലകൊള്ളുന്നു. മുഖ്യമന്ത്രി എം.കെ. സ്റ്റാലിൻ ഉൾപ്പെടെ നിരവധി പ്രമുഖർ പിന്നിലാണെന്നതും ശ്രദ്ധേയമാണ്.
പശ്ചിമ ബംഗാളിൽ ബിജെപിയും തൃണമൂൽ കോൺഗ്രസും തമ്മിലുള്ള കടുത്ത പോരാട്ടത്തിലാണ് വോട്ടെണ്ണൽ പുരോഗമിക്കുന്നത്. സംസ്ഥാനത്ത് ഭരണമാറ്റത്തിന്റെ സൂചനകൾ ശക്തമാണ്. ബിജെപി കേവല ഭൂരിപക്ഷം മറികടന്ന് മുന്നേറുന്ന സാഹചര്യമാണ് നിലവിലുള്ളത്. തൃണമൂൽ കോൺഗ്രസ് ശക്തമായ മത്സരം കാഴ്ചവയ്ക്കുന്നുണ്ടെങ്കിലും ലീഡ് നിലയിൽ പിന്നിലാണ്. തുടക്കത്തിൽ മുഖ്യമന്ത്രി മമതാ ബാനർജി പിന്നിലായെങ്കിലും പിന്നീട് ലീഡ് തിരികെ പിടിച്ചു. നന്ദിഗ്രാമിൽ സുവേന്ദു അധികാരി മുന്നിലാണ്. സംസ്ഥാനത്ത് കോൺഗ്രസും ഇടതുകക്ഷികളും ഏറെ പിന്നിലായി, രാഷ്ട്രീയ സമവാക്യത്തിൽ അവയുടെ സ്വാധീനം കുറയുന്ന കാഴ്ചയാണ്.
ആദ്യഘട്ട ഫലസൂചനകൾ ശരിവെക്കുകയാണെങ്കിൽ, മൂന്ന് പ്രധാന സംസ്ഥാനങ്ങളിലും ഭരണപരിവർത്തനത്തിനുള്ള സാധ്യതകൾ ശക്തമാകുന്നു. എന്നാൽ അന്തിമഫലം വ്യക്തമാകാൻ വോട്ടെണ്ണൽ പൂർണ്ണമായി പൂർത്തിയാകേണ്ടതുണ്ട്.
