സുബീന് ഗാര്ഗിന്റേതു അപകട മരണമല്ല, കൊലപാതകം; സ്ഥിരീകരിച്ച് മുഖ്യമന്ത്രി; പിന്നില് ഞെട്ടിക്കുന്ന കാരണങ്ങള്; ‘ഒരാള് കൊലപ്പെടുത്തി, മറ്റുള്ളവര് സഹായിച്ചു’
കൊല്ക്കത്ത: യുവജനങ്ങളുടെ ആരാധനാപാത്രമായ അസമീസ് ഗായകന് സുബീന് ഗാര്ഗിന്റെ (52) മരണം കൊലപാതകമെന്ന് അസം സര്ക്കാര്. മുഖ്യമന്ത്രി ഹിമന്ദ ബിശ്വ ശര്മ ഇക്കാര്യം നിയമസഭയെ അറിയിച്ചു. സ്കൂബ ഡൈവിങ്ങിനിടെയാണ് സുബീന് ഗാര്ഗ് മരിച്ചത്. സിംഗപ്പൂരിലെ നോര്ത്ത് ഈസ്റ്റ് ഇന്ത്യ ഫെസ്റ്റിവലില് പാടാനെത്തിയ സുബീന്, സ്കൂബ ഡൈവിങ്ങിനിടെയാണ് പരുക്കേറ്റത്. ആശുപത്രിയില് എത്തിച്ചെങ്കിലും മരണം സംഭവിച്ചു.
”സുബീന് ഗാര്ഗിന്റേത് അപകടമരണം അല്ലെന്നും കൊലപാതകമാണെന്നും അസം പൊലീസിന്റെ അന്വേഷണത്തില് കണ്ടെത്തി. ഒരാള് ഗാര്ഗിനെ കൊലപ്പെടുത്തി. മറ്റുള്ളവര് സഹായിച്ചു. അഞ്ചോളംപേരെ അറസ്റ്റു ചെയ്തു.”പ്രതിപക്ഷത്തിന്റെ അടിയന്തര പ്രമേയത്തിനു മറുപടിയായി മുഖ്യമന്ത്രി പറഞ്ഞു. കൊലപാതകത്തിലേക്കു നയിച്ച കാരണങ്ങള് ജനത്തെ ഞെട്ടിക്കുമെന്നും അദ്ദേഹം കൂട്ടിച്ചേര്ത്തു.
മരണത്തെക്കുറിച്ച് അന്വേഷിക്കാന് പ്രത്യേക പൊലീസ് സംഘത്തെ നിയോഗിച്ചതിനു പുറമേ ഹൈക്കോടതി സിറ്റിങ് ജഡ്ജിയുടെ മേല്നോട്ടത്തിലുള്ള അന്വേഷണവും സര്ക്കാര് പ്രഖ്യാപിച്ചിരുന്നു. ഗായകന്റെ മാനേജരും സംഘത്തിലുള്ളവരുമാണ് അറസ്റ്റിലായത്. ഗായകന്റെ സുരക്ഷാ ഉദ്യോഗസ്ഥരും അറസ്റ്റിലായി.
ഇമ്രാന് ഹഷ്മിയും കങ്കണ റനൗട്ടും അഭിനയിച്ച ഗാങ്സ്റ്റര് സിനിമയിലെ ‘യാ അലി’ എന്ന ഹിറ്റ് പാട്ടിലൂടെയാണ് ബോളിവുഡിന്റെ പ്രിയഗായകനായത്. ഋതിക് റോഷന് അഭിനയിച്ച ക്രിഷ് 3 തുടങ്ങിയ സിനിമകളിലും പാടി. ചലച്ചിത്ര നടനായും സംവിധായകനായും സംഗീത സംവിധായകനായും തിളങ്ങി. വന് ഹിറ്റുകളായി മാറിയ മിഷന് ചൈന, കാഞ്ചന്ജംഗ തുടങ്ങിയ അസമീസ് സിനിമകള് സംവിധാനം ചെയ്തു, അഭിനയിച്ചു. ധോല്, ദോതാര, ഡ്രംസ്, തബല തുടങ്ങി 12 സംഗീത ഉപകരണങ്ങളില് പ്രഗല്ഭനായിരുന്നു.
