സംസ്ഥാന സ്കൂള് കായികമേളയില് ഓവറോള് ചാമ്പ്യന്മാര്ക്കുള്ള സ്വര്ണക്കപ്പ് നേടിയത് തിരുവനന്തപുരം ; തൃശൂര് രണ്ടാമതും കണ്ണൂര് മൂന്നാമതും ; അത്ലറ്റിക്സില് മലപ്പുറം കിരീടം നിലനിര്ത്തി
തിരുവനന്തപുരം : സംസ്ഥാന സ്കൂള് കായികമേളയില് ഓവറോള് ചാമ്പ്യന്മാര്ക്കുള്ള സ്വര്ണക്കപ്പ് നേടിയത് തിരുവനന്തപുരം. 1825 പോയിന്റോടെയാണ് തിരുവനന്തപുരം ഓവറോള് കിരീടം നേടിയത്. 892 പോയിന്റ് നേടി തൃശൂര് റണ്ണറപ്പ് ട്രോഫിയും 892 പോയിന്റുമായി മൂന്നാം സ്ഥാനം കണ്ണൂരും നേടി. പുരസ്കാരം ഗവര്ണര് രാജേന്ദ്ര അര്ലേക്കര് സമ്മാനിച്ചു.
അത്ലറ്റിക്സില് മലപ്പുറം കിരീടം നിലനിര്ത്തി. അത്ലറ്റിക്സ് മത്സരത്തിന്റെ അവസാനം 4 – 100 മീറ്റര് റിലേയിലെ ആധിപത്യമാണ് മലപ്പുറത്തിനെ ജേതാക്കള് ആക്കിയത്. ഒരു മീറ്റ് റെക്കോര്ഡ് അടക്കം മൂന്നു സ്വര്ണമാണ് റിലേയില് മലപ്പുറം നേടിയത്. മലപ്പുറം 247 പോയിന്റും പാലക്കാട് 212 പോയിന്റുമാണ് നേടിയത്.
അക്വാട്ടിക്സ്, ഗെയിംസ് ഇനങ്ങളില് വ്യക്തമായ ആധിപത്യം പുലര്ത്തിയാണ് തിരുവനന്തപുരം ഇത്തവണത്തെ ചാംപ്യന്മാരായത്. ഗെയിംസ് ഇനങ്ങളില് 798 പോയിന്റുകള് നേടിയ കണ്ണൂരിനെ ബഹുദൂരം പിന്നിലാക്കിയാണ് 1107 പോയിന്റുകളോടെ തിരുവനന്തപുരം ഒന്നാമതായത്. അക്വാട്ടിക്സില് 649 പോയിന്റുകളാണ് തിരുവനന്തപുരം നേടിയെടുത്തത്. അക്വാടിക്സിലെ 149 പോയിന്റുകള് തൃശൂര് ജില്ലാ രണ്ടാമത് എത്തിച്ചു. 212 പോയിന്റുകളോടെ പാലക്കാട് അത്ലറ്റിക്സില് രണ്ടാമതായി.
അക്വാട്ടിക്കിലും ഗെയിംസിലും ഏറെ മുന്നില്നിന്ന തിരുവനന്തപുരത്തിന് തിളങ്ങാനാവാതെപോയ വിഭാഗമാണ് അത്ലറ്റിക്സ്. ആകെ 69 പോയിന്റാണ് ഈ ഇനത്തില്നിന്നും തിരുവനന്തപുരത്തിന് നേടാനായത്.
സ്കൂളുകളില് തുടര്ച്ചയായ നാലാം വര്ഷവും മലപ്പുറത്തിന്റെ ഐഡിയല് കടകശ്ശേരി ചാമ്പ്യന്മാരായി. 78 പോയിന്റാണ് നേട്ടം. 13 കുട്ടികളുമായി മത്സരിക്കാന് എത്തിയ വിഎംഎച്ച്എസ് വടവന്നൂര് 58 പോയിന്റ് നേടി രണ്ടാമത് എത്തി. കഴിഞ്ഞതവണ രണ്ടാം സ്ഥാനക്കാരായിരുന്ന നാവാമുകുന്ദ തിരുനാവായ മൂന്നാം സ്ഥാനക്കാരായി.
മികച്ച സ്പോര്ട്സ് സ്കൂള് ചാമ്പ്യന്മാര് 57 പോയിന്റ് നേടിയ ജിവി രാജയാണ്. ജൂനിയര് പെണ്കുട്ടികളുടെ 400 മീറ്ററില് കൂടി സ്വര്ണം നേടിയതോടെ പാലക്കാടിന്റെ നിവേദ്യ കലാധര് ട്രിപ്പിള് സ്വര്ണം നേടി. സീനിയര് പെണ്കുട്ടികളുടെ വിലയില് സ്വര്ണം ലഭിച്ചതോടെ ആദിത്യ അജിയുടെ സ്വര്ണ നേട്ടം നാലായി. കണ്ണൂരിലാണ് അടുത്ത കായികമേള നടക്കുക.
