അകത്ത് എഐഎസ്എഫ്, പുറത്ത് ഡിവൈഎഫ്ഐ; യുദ്ധക്കളമായി ‘കേരള’ ആസ്ഥാനം; വിസിയെ അവഗണിച്ച് രജിസ്ട്രാര് മുറിയിലെത്തി
തിരുവനന്തപുരം: കേരള സര്വകലാശാലയുടെ അകത്തും പുറത്തും പ്രതിഷേധവുമായി സംഘടനകള്. സര്വകലാശാലയ്ക്കകത്ത് എഐഎസ്എഫ് പ്രവര്ത്തകരും പുറത്ത് ഡിവൈഎഫ്ഐ പ്രവര്ത്തകരുമാണ് പ്രതിഷേധവുമായി എത്തിയത്. എഐഎസ്എഫ് പ്രവര്ത്തകരെ പോലീസ് ബലംപ്രയോഗിച്ച് അറസ്റ്റുചെയ്ത് മാറ്റി. പുറത്ത് ഡിവൈഎഫ്ഐ പ്രവര്ത്തകര് കുത്തിയിരുന്ന് പ്രതിഷേധിക്കുകയാണ്.
രജിസ്ട്രാര് ഡോ.കെ.എസ്.അനികുമാറിന്റെ സസ്പെന്ഷന് തുടരുകയാണെന്നും ഓഫിസില് കടക്കാന് അനുവദിക്കരുതെന്നും വിസി ഡോ. മോഹന് കുന്നുമ്മല് നിര്ദേശം നല്കിയിരുന്നെങ്കിലും അതു പാലിക്കാന് സര്വകലാശാല സുരക്ഷാ ഉദ്യോഗസ്ഥര് തയാറായില്ല. രാവിലെ ക്യാംപസിലെത്തിയ രജിസ്ട്രാര് യാതൊരു തടസവും കൂടാതെ ഓഫീസില് പ്രവേശിച്ചു. അതേസമയം, രജിസ്ട്രാറുടെ പൂര്ണ ചുമതല ഡോ.മിനി കാപ്പനു നല്കിയ വിസി ഇന്ന് ഉത്തരവറിക്കി.
ഈ സമയത്താണ് എഐഎസ്എഫ് പ്രവര്ത്തകര് യൂണിവേഴ്സിറ്റിക്കുള്ളില് പ്രതിഷേധം സംഘടിപ്പിച്ചത്. കെട്ടിടത്തിനുള്ളിലേക്ക് കടക്കാന് ശ്രമിച്ച പ്രവര്ത്തകരെ പോലീസ് ബലംപ്രയോഗിച്ച് അറസ്റ്റുചെയ്ത് നീക്കി. ഇതിനുപിന്നാലെയാണ് ഡിവൈഎഫ്ഐ പ്രവര്ത്തകര് പ്രതിഷേധവുമായി യൂണിവേഴ്സിറ്റിക്ക് മുന്നില് എത്തിയത്. ബാരിക്കേഡ് ഉപയോഗിച്ച് അടച്ചിരുന്ന ഗേറ്റ് തകര്ത്ത് പ്രവര്ത്തകര് ഉള്ളിലേക്ക് കടക്കാന് ശ്രമിച്ചതോടെ പോലീസ് ജലപീരങ്കി പ്രയോഗിച്ചു.
പിന്നാലെ, അക്രമാസക്തരായ പ്രവര്ത്തകര് പോലീസിനെയും പോലീസ് വാഹനങ്ങളെയും ആക്രമിച്ചു. നിലവില് യൂണിവേഴ്സിറ്റിക്ക് മുന്നില് കുത്തിയിരുന്ന പ്രതിഷേധിക്കുകയാണ് ഇവര്. അതേസമയം, എസ്എഫ്ഐ പ്രവര്ത്തകര് പ്രതിഷേധവുമായി ഗവര്ണറുടെ വസതിയിലേക്ക് നീങ്ങിയിട്ടുണ്ടെന്നാണ് വിവരം.
