അവിവാഹിത, ഇപ്പോള് ആറുമാസം ഗര്ഭിണി! നടി ഭാവനയുടെ പ്രഖ്യാപനത്തില് കയ്യടിച്ച് സിനിമാ ലോകം
വിവാഹത്തിന് പുറമേനിന്നു കൊണ്ട് ഗര്ഭംധരിച്ച് അമ്മയാവുന്നു എന്ന് ഉറക്കെ പ്രഖ്യാപിക്കാന് ഇന്ത്യന് സിനിമാ ചരിത്രത്തില് സധൈര്യം മുന്നോട്ടുവന്ന നടി ആരെന്ന ചോദ്യത്തിന് അന്നും ഇന്നും ഉത്തരം ഒന്നേയുള്ളൂ; നീന ഗുപ്ത. വിന്ഡീസ് ക്രിക്കറ്റ് ഇതിഹാസം വിവിയന് റിച്ചാര്ഡ്സില് നീനയ്ക്ക് മസാബ ഗുപ്ത പിറന്നത് ഇന്നും ചരിത്രം. എന്നാല്, മകളെ ആ അമ്മ അത്തരമൊരു സാഹസത്തിനു അനുവദിച്ചില്ല താനും. പില്ക്കാലത്ത്, പ്രണയത്തില് നിന്നും ഉടലെടുത്തവള് എന്ന നിലയില് തന്റെ മേക്കപ്പ് ബ്രാന്ഡിന് പോലും മസാബ നല്കിയ പേര് ‘ലവ് ചൈല്ഡ്’ എന്നും. പതിറ്റാണ്ടുകള്ക്കിപ്പുറം, താന് വിവാഹം ചെയ്യാതെ അമ്മയാവുന്നു എന്ന പ്രഖ്യാപനവുമായി ഇതാ മറ്റൊരു അഭിനേത്രി കൂടി. അവരുടെ പേര് ഭാവന രാമണ്ണ.
അങ്ങ് ഉത്തരേന്ത്യയിലൊന്നുമല്ല സംഭവം, നമ്മുടെ സ്വന്തം തെന്നിന്ത്യന് സിനിമയുടെ ഭാഗമാണ് ഭാവനയും. നടിയും നര്ത്തകിയുമാണവര്. തന്റെ ഇരുപതുകളിലും മുപ്പതുകളിലും അമ്മയാവണം എന്ന ആഗ്രഹം അത്രകണ്ട് മോഹിപ്പിച്ചില്ല എങ്കിലും ഭാവന ആ ആഗ്രഹത്തിന് ചെവികൊണ്ടില്ല. എന്നാല്, നാല്പതുകളുടെ തുടക്കമായതും ഇനിയും വച്ച് താമസിപ്പിക്കാന് അവര് തയാറായില്ല. ഒടുവില് ഉണ്ണിക്കായി ആ അമ്മ കനവുകള് നെയ്തു തുടങ്ങി. വിവാഹം ചെയ്യാതെ തന്നെ ഇരട്ടക്കുട്ടികളുടെ അമ്മയാവാനുള്ള തയാറെടുപ്പിലാണ് കന്നഡ നടി ഭാവന ഇപ്പോള്.
ഇപ്പോള് ആറാം മാസമായി. ആ ആഗ്രഹം സഫലീകരിക്കുന്നതിന്റെ ത്രില് അവര് ഇന്സ്റ്റഗ്രാമില് നിറവയറുമായി നില്ക്കുന്ന ചിത്രങ്ങളിലൂടെ ഷെയര് ചെയ്തതും, പരിഹാസ ചിരി ഇമോജി അടിക്കാനല്ല, ആ സന്തോഷത്തില് ഒപ്പം ചേരാന് വന്നവര് ഏറെ. ഒരുപക്ഷേ, തന്റെ അമ്മ ഇന്ന് ജീവനോടെ ഉണ്ടായിരുന്നെങ്കില്, ലോകത്തേറ്റവും സന്തോഷിക്കുക അവരായിരുന്നേനെ എന്ന് ഭാവന. അച്ഛനും സഹോദരങ്ങളും ഭാവനയുടെ തീരുമാനത്തിനൊപ്പമുണ്ട്. മക്കളുടെ ഭാവി വരെ മുന്നില്ക്കണ്ടുകൊണ്ടു കൂടിയാണ് ഭാവന സിംഗിള് മദര് ആയി നിലകൊള്ളാന് ഉറച്ച തീരുമാനമെടുത്തത്. അമ്മയാവാനുള്ള യാത്രയെ കുറിച്ച് ഭാവന വാചാലയാവുന്നു.
ഭാവന രാമണ്ണ തന്റെ ആഗ്രഹവുമായി ഫെര്ട്ടിലിറ്റി ചികിത്സാ കേന്ദ്രങ്ങളുടെ വാതില് മുട്ടിയതും, അതില് പലരും പിന്തുണച്ചില്ല എന്നവര് പറയുന്നു. എന്നാല്, വീടിനടുത്തു തന്നെയുള്ള ഒരു കേന്ദ്രം ഭാവനയുടെ സ്വപ്നത്തിന്റെ വില മനസിലാക്കി ഒപ്പം നിന്നു. ബീജദാനത്തിലൂടെ, ഐ.വി.എഫ്. ചികിത്സയുടെ പിന്ബലത്തോടെ, നടി ഇരട്ടകളെ ഗര്ഭം ധരിച്ചു. ഇനി ഇരട്ടക്കുട്ടികളുടെ അമ്മയാവാനുള്ള കാത്തിരിപ്പ് മാത്രം. പ്രായം നാല്പത് പിന്നിട്ടു. വിവാഹം എന്ന സംഭവം തന്റെ ജീവിതത്തില് നടക്കില്ല എന്നുറപ്പായതും, ഭാവന മറ്റു മാര്ഗങ്ങള് സ്വീകരിക്കാന് തീരുമാനിക്കുകയായിരുന്നു. മാതാപിതാക്കളും മൂന്നു സഹോദരങ്ങളുമടങ്ങുന്ന കൂട്ടുകുടുംബത്തിലാണ് ഭാവന ജീവിച്ചത്.
ഈ വര്ഷത്തിന്റെ രണ്ടാം പകുതിയില് താന് അമ്മയാവും എന്ന സന്തോഷത്തിരയിളക്കത്തിലാണ് ഭാവന ഇപ്പോള്. എപ്പോഴും കുഞ്ഞുങ്ങളാല് ചുറ്റപ്പെട്ടിരിക്കാന് ആഗ്രഹിച്ചയാളാണ് താനെന്നും ഭാവന രാമണ്ണ. ഏറെക്കാലം നിയമത്തിന്റെ സഹായമില്ലാതിരുന്നത് കൂടി അവിവാഹിതയായ ഭാവന രാമണ്ണയുടെ ഗര്ഭധാരണം വൈകിച്ചു. എന്നാല്, നിയമപിന്തുണ കൂടിയായതോടെ അവര് ദൃഢനിശ്ചയത്തോടു കൂടി മുന്നോട്ടു പോയി. ചില ഐ.വി.എഫ്. ക്ലിനിക്കുകള് താന് വിവാഹിത അല്ലെന്ന് കേട്ടതും കോള് പോലും കട്ട് ചെയ്തിരുന്നു എന്നവര് ഓര്ക്കുന്നു. തീരുമാനത്തെ ചോദ്യം ചെയ്തവരോട് ഈ തീരുമാനത്തില് തനിക്ക് വ്യക്തതയും ഉറപ്പും ഉള്ളതായി അവര് പ്രതികരിച്ചു.
തന്നെ വളര്ത്തി വലുതാക്കിയവര് നല്കിയ ആത്മബലത്തെ മുന്നിര്ത്തി കുഞ്ഞുങ്ങളെ വരവേല്ക്കാന് തൊട്ടിലൊരുക്കുകയാണ് ഈ അമ്മ. രാരീരം പാടാന്, കുഞ്ഞിക്കാല്ചുവടുകള് പിച്ചവച്ചോടുന്ന മുറ്റത്തെ തിണ്ണയില് ഇരുന്ന് നിറഞ്ഞു ചിരിക്കാന്, ആ പാല്പുഞ്ചിരികള് തിരിച്ചും ഏറ്റുവാങ്ങാന്.
