ഇസ്ലാമാബാദ്: കുടുംബാംഗങ്ങളുടെ സോഷ്യല്‍ മീഡിയ ഉപയോഗവും ആധുനിക രീതിയിലുള്ള ജീവിതവും ഇഷ്ടപ്പെടാതിരുന്ന ഗൃഹനാഥന്‍ അമ്മയേയും സഹോദരിമാരെയും കഴുത്തറുത്ത് കൊന്നു. പാകിസ്ഥാനിലെ കറാച്ചിയിലാണ് സംഭവം. വീട്ടിലെ നാല് സ്ത്രീകളെയാണ് പ്രതിയായ ബിലാല്‍ അഹമ്മദ് കൊലപ്പെടുത്തിയത്. പ്രതിയെ പൊലീസ് കസ്റ്റഡിയിലെടുത്തിട്ടുണ്ട്.
അമ്മ, സഹോദരി, സഹോദരിയുടെ മകള്‍, സഹോദരന്റെ ഭാര്യ എന്നിവരെയാണ് ബിലാല്‍ കൊലപ്പെടുത്തിയത്. കറാച്ചിയിലെ ഓള്‍ഡ് സോള്‍ജ്യര്‍ ബസാറിലുള്ള അപ്പാര്‍ട്ട്മെന്റില്‍ നിന്നാണ് നാല് മൃതദേഹങ്ങളും പൊലീസ് കണ്ടെടുത്തത്. കുടുംബാംഗങ്ങളുടെ ജിവിതശൈലി തന്റെ ദാമ്പത്യജീവിതത്തെ താളം തെറ്റിച്ചുവെന്നാണ് പ്രതിയുടെ മൊഴി. മതപരമായ വിശ്വാസങ്ങളിലൂടെ മാത്രം ജിവിക്കുന്ന ഭാര്യ, ബന്ധം ഉപേക്ഷിച്ച് പോകാന്‍ കാരണം കുടുംബാംഗങ്ങളുടെ മോഡേണ്‍ ജീവിതമാണെന്നാണ് ബിലാലിന്റെ വാദം.
മരിച്ച നാല് സ്ത്രീകള്‍ക്കും സമൂഹ മാദ്ധ്യമങ്ങളില്‍ അക്കൗണ്ടുണ്ടായിരുന്നു. യുവതികള്‍ അവരുടെ ചിത്രങ്ങളും വീഡിയോകളും സമൂഹ മാദ്ധ്യമങ്ങളില്‍ പോസ്റ്റ് ചെയ്തിരുന്നതും ബിലാലിന് ഇഷ്ടപ്പെട്ടിരുന്നില്ല. ആദ്യം സഹോദരിയെ മാത്രം കൊല്ലാനാണ് പ്രതി പദ്ധതിയിട്ടിരുന്നത്. എന്നാല്‍, ശേഷിക്കുന്ന മൂന്നുപേര്‍ സംഭവത്തില്‍ ദൃക്സാക്ഷികളാകുമെന്നതിനാല്‍ അവരെയും കൊലപ്പെടുത്തുകയായിരുന്നു.
കഴിഞ്ഞ ദിവസമാണ് ബിലാലിനെ പൊലീസ് കസ്റ്റഡിയിലെടുത്തത്. കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു.
