മലപ്പുറം: സ്കൂള്‍ ബസിന് പിറകില്‍ ബെെക്കിടിച്ച്‌ ഗുരുതരമായി പരിക്കേറ്റ പത്താം ക്ലാസ് വിദ്യാർത്ഥി മരിച്ചു. മലപ്പുറം കൊണ്ടോട്ടി അരിമ്ബ്രയിലാണ് സംഭവം.
വേങ്ങര കിളിനക്കോട് വില്ലൻ വീട്ടില്‍ സിനാൻ (16) ആണ് മരിച്ചത്. കൂടെയുണ്ടായിരുന്ന സുഹൃത്ത് കിളിനക്കോട് സ്വദേശി കെ ടി സനീജ് കോഴിക്കോട്ടെ സ്വകാര്യ ആശുപത്രിയില്‍ ഗുരുതരാവസ്ഥയിൽ ചികിത്സയിലാണ്.
ഇന്നലെ വെെകുന്നേരം അഞ്ച് മണിയോടെയായിരുന്നു അപകടം ഉണ്ടായത്.കൊണ്ടോട്ടി ഭാഗത്തേക്ക് വരുമ്ബോള്‍ നിയന്ത്രണം വിട്ട ബെെക്ക് ബസിന്റെ പിറകില്‍ ഇടിക്കുകയായിരുന്നു. സ്കൂള്‍ വിദ്യാർത്ഥികളെ ഇറക്കാൻ നിർത്തിയിട്ടിരിക്കുകയായിരുന്നു ബസ്. പരിക്കേറ്റ ഇരുവരെയും നാട്ടുകാർ ഉടൻ കൊണ്ടോട്ടിയിലെ സ്വകാര്യ ആശുപത്രിയില്‍ എത്തിച്ചു. പിന്നീട് ഇവരെ കോഴിക്കോട്ടെ സ്വകാര്യ ആശുപത്രിയിലേക്ക് മാറ്റി. ഗുരുതരമായി പരിക്കേറ്റ സിനാൻ ചികിത്സയിലിരിക്കെയാണ് മരിച്ചത്.ചേറൂർ സ്കൂളിലെ വിദ്യാർത്ഥിയായിരുന്നു.
