ഗാന്ധിനഗര്‍: വിവാഹഘോഷയാത്രയ്ക്കിടെ കുതിരപ്പുറത്ത് യാത്ര ചെയ്ത ദളിത് വരന് മര്‍ദനം. ഗുജറാത്തിലെ ഗാന്ധിനഗറിലാണ് നാലു പേര്‍ ചേര്‍ന്ന് യുവാവിനെ ആക്രമിച്ചത്.
വധുവിന്റെ വീട്ടിലേക്ക് വരന്റെ സംഘം നടത്തിയ ഘോഷയാത്രയ്ക്കിടെ ബൈക്കിലെത്തിയ നാല്‍വര്‍ സംഘം യുവാവിനെ കുതിരപ്പുറത്തു നിന്ന് വലിച്ചു താഴെയിറക്കി മര്‍ദിക്കുകയായിരുന്നു. സവര്‍ണ്ണജാതിക്കാര്‍ മാത്രം കുതിരപ്പുറത്ത് കയറിയാല്‍ മതിയെന്നും പിന്നാക്ക ജാതിക്കാര്‍ തങ്ങളുടെ പരിധി ലംഘിക്കരുതെന്നും പറഞ്ഞായിരുന്നു മര്‍ദനമെന്ന് വരന്റെ കുടുംബം പരാതിപ്പെട്ടു. മര്‍ദിച്ച ശേഷം യുവാവിനെ നിര്‍ബന്ധപൂര്‍വം വാഹനത്തില്‍ കയറ്റി വധുവിന്റെ വീട്ടിലേക്ക് അയച്ചു.
മര്‍ദ്ദിച്ചവര്‍ക്കെതിരേ യുവാവിന്റെ കുടുംബത്തിന്റെ പരാതിയില്‍ പോലീസ് കേസെടുത്തു. സംഭവത്തില്‍ ശൈലേഷ് ഠാക്കൂര്‍, ജയേഷ് ഠാക്കൂര്‍, സമീര്‍ ഠാക്കൂര്‍, അശ്വിന്‍ ഠാക്കൂര്‍ എന്നിവരെ അറസ്റ്റ് ചെയ്തിട്ടുണ്ട്.
