മലയാളത്തിൽ സമീപകാലത്ത് ഏറ്റവും പ്രേക്ഷകപ്രീതി നേടിയ ചിത്രമാണ് കണ്ണൂർ സ്ക്വാഡ്. നവാഗതനായ റോബി വർഗീസ് രാജിൻറെ സംവിധാനത്തിൽ വ്യത്യസ്തമായ പൊലീസ് സ്റ്റോറി പറഞ്ഞ ചിത്രം സെപ്റ്റംബർ 28 നാണ് തിയറ്ററുകളിൽ എത്തിയത്. ആദ്യദിനം തന്നെ പോസിറ്റീവ് മൌത്ത് പബ്ലിസിറ്റി നേടിയെടുത്ത ചിത്രത്തിന് മൂന്നാം വാരത്തിലും മോശമില്ലാത്ത തിയറ്റർ ഒക്കുപ്പൻസിയുണ്ട്. കളക്ഷനിലും ആ മുന്നേറ്റം ദൃശ്യമാവുന്നുണ്ട്.
ദൃശ്യത്തെ പുറത്താക്കി മലയാളത്തിലെ എക്കാലത്തെയും വലിയ 10 പണംവാരിപ്പടങ്ങളുടെ ലിസ്റ്റിലേക്ക് കണ്ണൂർ സ്ക്വാഡ് ഇടംപിടിച്ചത് കഴിഞ്ഞ വാരമായിരുന്നു. ഇപ്പോഴിതാ പിന്നീടുള്ള ദിനങ്ങളിലെ കളക്ഷനോടെ ചിത്രം അതേ ലിസ്റ്റിലെ നില മെച്ചപ്പെടുത്തിയിരിക്കുകയാണ്. ലിസ്റ്റിൽ നിലവിൽ ഏഴാം സ്ഥാനത്താണ് ചിത്രം. അൽഫോൻസ് പുത്രൻറെ നിവിൻ പോളി ചിത്രം പ്രേമത്തെ മറികടന്നാണ് കണ്ണൂർ സ്ക്വാഡ് ഏഴാം സ്ഥാനത്തേക്ക് എത്തിയിരിക്കുന്നത്. പ്രേമം മാത്രമല്ല രോമാഞ്ചം, കായംകുളം കൊച്ചുണ്ണി തുടങ്ങിയ ചിത്രങ്ങളൊക്കെ ഇപ്പോൾ പുതിയ മമ്മൂട്ടി ചിത്രത്തേക്കാൾ പിന്നിലാണ്.
അതേസമയം ലിസ്റ്റിൽ ആദ്യ സ്ഥാനത്ത് 2018 ആണ്. രണ്ടാമത് പുലിമുരുകനും മൂന്നാമത് ലൂസിഫറും. നാലാം സ്ഥാനത്ത് മമ്മൂട്ടിയുടെ തന്നെ ഭീഷ്‍മ പർവ്വം. അഞ്ചാമത് ഓണം റിലീസ് ആയെത്തി കൈയടി വാങ്ങിയ ആർഡിഎക്സ്. ആറാം സ്ഥാനത്ത് ദുൽഖർ സൽമാൻ ടൈറ്റിൽ റോളിലെത്തിയ കുറുപ്പ്. ഏഴാമത് കണ്ണൂർ സ്ക്വാഡും എട്ടാമത് പ്രേമവും ഒൻപതാമത് രോമാഞ്ചവും പത്താമത് കായംകുളം കൊച്ചുണ്ണിയും.
കരിയറിൽ നിരവധി പൊലീസ് വേഷങ്ങളിൽ കൈയടി നേടിയിട്ടുള്ള മമ്മൂട്ടിയുടെ ഏറെ പ്രത്യേകതകളുള്ള പൊലീസ് വേഷമാണ് കണ്ണൂർ സ്ക്വാഡിലെ എഎസ്ഐ ജോർജ് മാർട്ടിൻ. കാസർഗോഡ് നടക്കുന്ന ഒരു നിഷ്ഠൂരമായ കുറ്റകൃത്യം നടത്തിയ പ്രതികളെ പിടിക്കാൻ ജോർജിൻറെ നേതൃത്വത്തിലുള്ള പ്രത്യേക അന്വേഷണസംഘം ഉത്തരേന്ത്യയിൽ നടത്തുന്ന അന്വേഷണമാണ് ചിത്രത്തിൻറെ പ്ലോട്ട്.
