കൊച്ചി: അങ്കമാലി താലൂക്ക് ആശുപത്രിയില്‍ പനിയ്ക്ക് ചികിത്സയ്ക്കായി രക്തപരിശോധനയ്ക്ക് എത്തിയ ബാലികയ്ക്ക് പേവിഷബാധയ്ക്ക് എതിരെയുള്ള പ്രതിരോധ കുത്തിവെയ്പ് നല്‍കി. സംഭവത്തില്‍ ഇന്ന് മുതല്‍ ആരോഗ്യവകുപ്പ് അന്വേഷണം നടത്തും. അങ്കമാല താലൂക്ക് ആശുപത്രിയിലെ നഴ്സ് ഉള്‍പ്പെടെയുള്ളവര്‍ക്കെതിരെ നടപടി ഉണ്ടാകും. അങ്കമാലി കോതകുളങ്ങര സ്വദേശിയായ ഏഴുവയസുകാരിക്കാണ് ദുരനുഭവം ഉണ്ടായത്. കുട്ടിയുടെ അമ്മ ഒപിയില്‍ ചീട്ടെടുക്കാന്‍ പോയ സമയത്താണ് കുട്ടിയുടെ രണ്ടു കൈകളിലും കുത്തിവെയ്പ് നല്‍കിയത്.
പനി ബാധിച്ച കുട്ടിയെ കഴിഞ്ഞ ബുധനാഴ്ച ഒപിയില്‍ ഡോക്ടറെ കാണിച്ചിരുന്നു. പനി കുറയാത്തതിനെ തുടര്‍ന്ന്, വെള്ളിയാഴ്ച രാവിലെ ഏഴരയോടെ വീണ്ടും ഡോക്ടറെ കണ്ടപ്പോള്‍ പനിയുടെ ഗുളിക കഴിക്കണമെന്നും കുറയുമ്പോള്‍ രക്തപരിശോധന നടത്തണമെന്നും നിര്‍ദേശിച്ചു. ഇതനുസരിച്ച്, കാഷ്വാല്‍റ്റിയുടെ സമീപത്തുള്ള നഴ്സിങ് റൂമിലെത്തി ഡോക്ടറുടെ കുറിപ്പ് നല്‍കി.
കുത്തിവെയ്പ് റൂമിലേക്ക് വരാന്‍ നഴ്സ് ആവശ്യപ്പെട്ടത് അനുസരിച്ച്, ഡോക്ടറുടെ ചീട്ട് കൊടുത്തപ്പോള്‍ തന്നെ തിരികെ നല്‍കി ഒപിയില്‍ പോയി ചീട്ടെടുത്ത് വരാന്‍ നിര്‍ദേശിച്ചു. ഇതിനായി കൗണ്ടറിലേക്ക് പോയി വന്നപ്പോഴേക്കും കുട്ടിക്ക് കുത്തിവെയ്പ് നല്‍കിയിരുന്നു. രക്തപരിശോധന നടത്താതെ കുത്തിവെയ്പ് എടുത്തതെന്തിനെന്ന് ചോദിച്ചപ്പോള്‍ കുട്ടിയെ പൂച്ച കടിച്ചിട്ടല്ലേ വന്നതെന്ന് നഴ്സ് ചോദിച്ചു.
ഡോക്ടര്‍ കുറിച്ചു നല്‍കിയ ചീട്ട് നഴ്സ് തിരിച്ചു തന്നതിനാല്‍ ചീട്ടില്ലാതെയാണ് നഴ്സ് കുത്തിവയ്പ്പെടുത്തതെന്ന് അമ്മ പറഞ്ഞു. വിഷയം തര്‍ക്കത്തിലേക്ക് നീങ്ങിയതോടെ ഡോക്ടര്‍മാരെത്തി വാക്സിന്‍ ആരോഗ്യ പ്രശ്നങ്ങള്‍ ഉണ്ടാക്കില്ലെന്ന് പറഞ്ഞു. പൂച്ചയുടെ വീടുകളിലുള്ളവര്‍ ഇത്തരം വാക്സിന്‍ എടുക്കാറുണ്ടെന്നും അറിയിച്ചു. വാക്സിന്റെ ബാക്കി ഡോസുകള്‍ അടുത്ത ദിവസങ്ങളില്‍ വന്ന് എടുക്കാനും നിര്‍ദേശിച്ചു.
പൂച്ച മാന്തിയതുമായി ബന്ധപ്പെട്ട് കുട്ടിക്ക് ഇതിനുമുന്‍പ് വാക്സിന്‍ എടുത്തിട്ടുണ്ടെന്നും ആവശ്യമില്ലാതെ കുത്തിവെയ്പ് നല്‍കിയതിനാല്‍ വിദഗ്ധ ചികിത്സയ്ക്കായി വേറെ ആശുപത്രിയില്‍ കൊണ്ടുപോകുമെന്നും വീട്ടുകാര്‍ പറഞ്ഞു. പൂച്ച കടിച്ചതിനെ തുടര്‍ന്ന് മറ്റൊരു കുട്ടി ഈ സമയത്ത് എത്തിയിരുന്നെന്നും രണ്ട് കുട്ടികളെയും തമ്മില്‍ മാറിപ്പോയതാണെന്നും പിന്നീട് വ്യക്തമായി. സംഭവത്തെ കുറിച്ച് അന്വേഷണം തുടങ്ങിയെന്ന് ആശുപത്രി സൂപ്രണ്ട് അറിയിച്ചു. മാറി കുത്തിവെച്ചതിനാല്‍ കുട്ടി ഇപ്പോള്‍ നിരീക്ഷണത്തിലാണ്. പനി ഉണ്ടെങ്കിലും കുട്ടിക്ക് മറ്റ് ആരോഗ്യപ്രശ്നങ്ങളൊന്നും ഇല്ല.
