പത്തനംതിട്ട: ഓടിക്കൊണ്ടിരുന്ന കാറിന് മുകളിലേക്ക് വൈദ്യതി തൂൺ ഒടിഞ്ഞ് വീണെങ്കിലും കാര്‍ യാത്രികൻ അത്ഭുതകരമായി രക്ഷപ്പെട്ടു.
അടൂർ ഏഴംകുളം മാങ്കുട്ടത്ത് സ്വകാര്യ വ്യക്തിയുടെ പുരയിടത്തില്‍ നിന്ന മരം കടപുഴകി റോഡിലെ വൈദ്യുതി ലൈനിന് മുകളില്‍ വീണാണ് അപകടം ഉണ്ടായത്.മരം വീണതിൻ്റെ ആഘാതത്തില്‍ മൂന്ന് വൈദ്യുത തൂണുകള്‍ ഒടിഞ്ഞു. അതില്‍ ഒരു തുണ് ഈ സമയം അതുവഴി വന്ന കാറിന് മുകളില്‍ പതിക്കുകയായിരുന്നു.
കാറിൻ്റെ മുകള്‍ഭാഗം പൂര്‍ണ്ണമായും തകര്‍ന്നെങ്കിലും കാറോടിച്ചിരുന്ന കോന്നി സ്വദേശി ശ്രീജിത്ത് അത്ഭുതകരമായി രക്ഷപ്പെട്ടു.കാറില്‍ ഈ സമയം ശ്രീജിത്ത് മാത്രമാണ് ഉണ്ടായിരുന്നത്.അടുരില്‍ നിന്നും ഫയര്‍ഫോഴ്സ് എത്തി മരങ്ങള്‍ മുറിച്ച്‌ മാറ്റുകയും കെ എസ് ഈ ബി ഉദ്യോഗസ്ഥര്‍ ലൈൻ ഓഫ് ചെയ്ത് പോസ്റ്റ് നീക്കം ചെയ്യുകയും ചെയ്ത ശേഷമാണ് കാർ പുറത്തെടുക്കാനായത്.
