ന്യൂഡല്‍ഹി: ഇന്ത്യന്‍ ക്രിക്കറ്റ് താരവും ഐപിഎലില്‍ കൊല്‍ക്കത്ത നൈറ്റ് റൈഡേഴ്‌സ് ടീമിന്റെ ക്യാപ്റ്റനുമായ നിതീഷ് റാണയുടെ ഭാര്യ സച്ചി മാര്‍വയ്ക്കു നേരെ ആക്രമണശ്രമം. ജോലി കഴിഞ്ഞു മടങ്ങവേ രണ്ടു യുവാക്കള്‍ ബൈക്കില്‍ പിന്തുടരുകയും സച്ചി സഞ്ചരിച്ച കാറില്‍ ഇടിക്കുകയും ചെയ്‌തെന്നാണ് പരാതി. സംഭവത്തില്‍ കേസ് റജിസ്റ്റര്‍ ചെയ്ത ഡല്‍ഹി പോലീസ് ഒരാളെ അറസ്റ്റ് ചെയ്യുകയും ചെയ്തു.
ഡല്‍ഹിയിലെ കിര്‍തി നഗറില്‍നിന്ന് ജോലി കഴിഞ്ഞ് വീട്ടിലേക്കു മടങ്ങവേയാണ് സംഭവം. സച്ചി സഞ്ചരിച്ച് കാറിനെ പിന്തുടര്‍ന്ന യുവാക്കള്‍ അവരുടെ കാറില്‍ ഇടിച്ചു. ഈ സംഭവം ഫോണില്‍ പകര്‍ത്തിയ സച്ചി ഇത് തന്റെ സമൂഹമാധ്യമ അക്കൗണ്ടില്‍ പങ്കുവയ്ക്കുകയും ചെയ്തു.
സംഭവത്തില്‍ കേസ് റജിസ്റ്റര്‍ ചെയ്യാന്‍ പോലീസ് ആദ്യം വിസമ്മതിച്ചെന്നും സച്ചി പറയുന്നുണ്ട്. ”നിങ്ങള്‍ സുരക്ഷിതമായി വീട്ടില്‍ എത്തിയല്ലോ പിന്നെന്തിനാണ് കേസെടുക്കുന്നത്, അടുത്ത തവണ വാഹനത്തിന്റെ നമ്പര്‍ നോട്ട് ചെയ്തു നല്‍കൂ” എന്നാണത്രെ പോലീസ് പറഞ്ഞതെന്ന് സച്ചി ഇന്‍സ്റ്റഗ്രാമില്‍ പങ്കുവച്ച സ്റ്റോറിയില്‍ പറഞ്ഞു.
സംഭവത്തിന്റെ വീഡിയോ അടക്കം ഇന്‍സ്റ്റഗ്രാമില്‍ പങ്കുവച്ച സച്ചി അടുത്ത തവണ അവരുടെ ഫോണ്‍ നമ്പര്‍ കൂടി സംഘടിപ്പിച്ച് തരാമെന്ന് പോലീസിനെ പരിഹസിക്കുകയും ചെയ്തു. സച്ചി പങ്കുവച്ച് വീഡിയോയില്‍ അവരെ പിന്തുടരുന്ന യുവാക്കളെ കൃത്യമായി കാണാം.
