നഹാസ് ഹിദായത്ത് സംവിധാനം ചെയ്യുന്ന ആര്ഡിഎക്സിന്റെ സെറ്റില് നായകന് ഷെയ്ന് നിഗം പ്രശ്നങ്ങള് ഉണ്ടാക്കിയെന്ന തരത്തില് സമൂഹമാധ്യമങ്ങളില് ചര്ച്ചസജീവമാകുന്നു. സെറ്റില് ഷെയ്ന് പിടിവാശി കാണിച്ചു. കോമ്പിനേഷന് രംഗങ്ങളില് തനിക്ക് കൂടുതല് പ്രധാന്യം നല്കണമെന്ന് ആവശ്യപ്പെട്ടു. എഡിറ്റ് ചെയ്ത ദൃശ്യങ്ങള് തന്നെ കാണിക്കണമെന്ന് പറഞ്ഞു. ഇത് അംഗീകരിക്കാതെ വന്നതിനെ തുടര്ന്ന് ലാല്, ബാബു ആന്റണി, ബൈജു തുടങ്ങിയ അഭിനേതാക്കള് ഉണ്ടായിരുന്ന സെറ്റില് നിന്ന് ഇറങ്ങിപ്പോയി. ഷൂട്ടിങ് മുടങ്ങി സിനിമ പ്രതിസന്ധിയിലായി എന്നുമൊക്കെയാണ് സിനിമാഗ്രൂപ്പുകളില് പ്രചരിച്ചത്.
അതേസമയം, ഷെയ്ന് നിഗവും അദ്ദേഹത്തിന്റെ അമ്മയും ആര്ഡിഎക്സിന്റെ ഷൂട്ടിങ് സെറ്റില് നിരന്തരം പ്രശ്നങ്ങളുണ്ടാക്കുകയാണെന്ന് ചില ഓണ്ലൈന് മാധ്യമങ്ങള് റിപ്പോര്ട്ട് ചെയ്തിരുന്നു. എന്നാല്, വിഷയത്തില് ചിത്രത്തിന്റെ അണിയറ പ്രവര്ത്തകര് പ്രതികരിച്ചിട്ടില്ല. ആര്ഡിഎക്സിന്റെ ഷൂട്ടിങ് സുഗമമായി നടക്കുന്നു എന്ന വാര്ത്തയാണ് ഷെയ്ന് നിഗം സോഷ്യല് മീഡിയയില് പങ്കുവച്ചത്.
വിവാദത്തില് ഫെഫ്ക ഇടപ്പെട്ടുവെന്നും പ്രശ്നങ്ങളെല്ലാം ഒത്തു തീര്പ്പാക്കിയെന്നുമാണ് ഇപ്പോള് വരുന്ന റിപ്പോര്ട്ടുകള്. സിനിമയുടെ ചിത്രീകരണം ഉടന് പൂര്ത്തിയാകുമെന്നാണ് വിവരം. അതിനിടെ ആര്ഡിഎക്സിന്റെ ചിത്രീകരണം നടക്കുന്നുവെന്ന് വ്യക്തമാക്കാനായി ഷെയ്ന് ഒരു വീഡിയോ പങ്കുവച്ചു.
