കൊച്ചി: എംഡിഎംഎ കൈവശം വെച്ച കേസ്സില്‍ കാക്കനാട് സ്വദേശി ഷെമിം ഷാ അറസ്റ്റിലായ കേസിന്റെ തുടരന്വേഷണത്തില്‍ നൈജീരിയന്‍ പൗരന്‍ പിടിയില്‍. നൈജീരിയ സ്വദേശി ഒകോങ്ക്വോ ഇമ്മാനുവലാണ് തൃക്കാക്കര അസി.പോലീസ് കമ്മീഷണറുടെ നേതൃത്വത്തിലുളള അന്വേഷണ സംഘത്തിന്റെ പിടിയിലായത്. കേരളത്തിലും രാജ്യാന്തര തലത്തിലും നിരോധിത സിന്തറ്റിക് ഡ്രഗ് വിതരണം നടത്തുന്ന സംഘത്തിലെ പ്രധാനിയായ – ഒെകോങ്ക്വോ ഇമ്മാനുവല്ലിനെ ബംഗളുരുവില്‍ നിന്നാണ് പോലീസ് പിടികൂടിയത്.
കാക്കനാട് സ്വദേശി ഷമീം ഷായുടെ പക്കല്‍ നിന്നും കണ്ടെടുത്ത മയക്കുമരുന്നിന്റെ ഉറവിടം കണ്ടെത്തുന്നതിനായി കൊച്ചി സിറ്റി പോലീസ് കമ്മിഷണര്‍ കെ.സേതുരാമന്‍ ഐപിഎസിന്റെ നിര്‍ദ്ദേശപ്രകാരം തൃക്കാക്കര അസി. പോലീസ് കമ്മിഷണര്‍ പിവി ബേബിയുടെ നേതൃത്വത്തില്‍ രൂപീകരിച്ച പ്രത്യേക അന്വേഷണ സംഘമാണ് ബാംഗ്ലൂരില്‍ നിന്നും പ്രതിയെ പിടികൂടി ചോദ്യം ചെയ്തതിന് ശേഷം അറസ്റ്റ് ചെയ്തത്. പ്രതിയെ കാക്കനാട് ജഡീഷ്യല്‍ മജിസ്‌ട്രേറ്റ് കോടതിയില്‍ ഹാജരാക്കും.
അന്വേഷണ സംഘത്തില്‍ ഇന്‍ഫോപാര്‍ക്ക് പോലീസ് സ്റ്റേഷന്‍ ഇന്‍സ്‌പെക്ടര്‍ വിപിന്‍ദാസ്, തൃക്കാക്കര പോലീസ് സ്റ്റേഷന്‍ സബ്ബ് ഇന്‍സ്‌പെക്ടര്‍ പി.ബി അനീഷ്, തുടങ്ങിയ ഉദ്യോഗസ്ഥര്‍ ഉണ്ടായിരുന്നു. മയക്കുമരുന്ന് കൂടുതല്‍ അളവില്‍ കേരളത്തിലെത്തിക്കുന്ന റാക്കറ്റുകളെ കേന്ദ്രീകരിച്ചും കേരളം ഉള്‍പ്പെടെയുള്ള പലയിടങ്ങളിലും മയക്കുമരുന്ന് എത്തിച്ചിട്ടുണ്ടെന്നുള്ള വിവരത്തെ കുറിച്ചും പോലീസ് അന്വേഷണം തുടരുന്നുണ്ട്.
