തൊടുപുഴ: ഇടുക്കി ജില്ലയിൽ കാട്ടാന ആക്രമണം രൂക്ഷമാകുന്നതിനിടെ വിവാദ പ്രസ്താവനയുമായി ഇടുക്കി ഡിസിസി പ്രസിഡന്റ് സിപി മാത്യു. നാട്ടിലിറങ്ങുന്ന കാട്ടാനകളെ സർക്കാർ പിടിച്ചില്ലെങ്കിൽ വെടിവെച്ചു കൊല്ലുമെന്ന് സി.പി. മാത്യു പറഞ്ഞു. ആനയുടെ തിരുനെറ്റിക്ക് വെടിവയ്ക്കാൻ അറിയാവുന്ന സുഹൃത്തുക്കളുണ്ട്. ഇടുക്കിയിലെ കാട്ടാന ശല്യത്തിൽ സർക്കാർ നടപടിയുണ്ടായില്ലെങ്കിൽ നിയമവിരുദ്ധമെങ്കിലും വേട്ടക്കാരെ കൊണ്ടുവന്ന് ആനകളെ വെടിവെക്കും. കാട്ടാനയെ തുരത്താൻ ചർച്ചയല്ല നടപടിയാണ് വേണ്ടതെന്നും മാത്യു പറഞ്ഞു.
അതേസമയം, വേണ്ടി വന്നാൽ മയക്കുവെടി വച്ച് പിടികൂടി കൂട്ടിലാക്കാനുള്ള പദ്ധതിയുമായി ഇടുക്കിയിലെ കാട്ടാനശല്യത്തിന് പരിഹാരം കാണാന്‍ വയനാട്ടില്‍ നിന്നുള്ള ദ്രുതകര്‍മസേന എത്തി. വയനാട് ആര്‍.ആര്‍.ടി റേഞ്ച് ഓഫീസര്‍ രൂപേഷിന്റെ നേതൃത്വത്തിലുള്ള അഞ്ചംഗ സംസംഘം ശാന്തന്‍പാറ, ചിന്നക്കനാല്‍ പഞ്ചായത്തുകളിലെ അക്രമകാരികളായ ആനകളെ ഞായറാഴ്ച മുതല്‍ നിരീക്ഷണം നടത്തും. അതിനു ശേഷമായിരിക്കും ആവശ്യമായ നടപടികൾ സ്വീകരിക്കുക.
ദ്രുതകര്‍മ സേനയുടെ വരവ് ചിന്നക്കനാല്‍, ആനയിറങ്കല്‍, ശാന്തന്‍പാറ മേഖലകളിലെ കര്‍ഷകര്‍ പ്രതീക്ഷയോടെയാണ് കാണുന്നത്. പ്രശ്‌ന പരിഹാരത്തിന് സര്‍ക്കാര്‍ നിയോഗിച്ച നോഡല്‍ ഓഫീസറായ ഹൈറേഞ്ച് സര്‍ക്കിള്‍ സി.സി.എഫ്, ആര്‍.എസ്. അരുണ്‍, മൂന്നാര്‍ ഡി.എഫ്.ഒ എന്നിവരുമായി ആർ.ആർ.ടി. സംഘം ആശയവിനിമയം നടത്തും. അക്രമകാരികളായ ആനകളെയും സംഘംനിരീക്ഷിക്കും.
ഇടുക്കിയിലെ ഭൂപ്രകൃതിയെക്കുറിച്ച് പഠിച്ച ശേഷം അപകടകാരികളായ ആനകളെ മയക്കു വെടിവെച്ച് പിടിക്കുന്നതടക്കമുള്ള കാര്യങ്ങള്‍ വിലയിരുത്തുമെന്നാണ് അറിയുന്നത്. വിശദമായ റിപ്പോര്‍ട്ട് ലഭിച്ചതിന് ശേഷമാകും ഡോ. അരുണ്‍ സക്കറിയയുടെ നേതൃത്വത്തില്‍ തുടര്‍ നടപടികള്‍ സ്വീകരിക്കുക.
