ഒരിടവേളയ്ക്ക് ശേഷം ഈസ്റ്റ് കോസ്റ്റ് വിജയൻ സംവിധാനം ചെയ്യുന്ന “കള്ളനും ഭഗവതിയും” എന്ന ചിത്രത്തിലെ കരോൾ ഗാനം പുറത്തിറങ്ങി. കെ.വി. അനിൽ തിരക്കഥ എഴുതിയ ചിത്രത്തിലെ ക്രിസ്മസ് കരോൾ ഗാനത്തിന്റെ ലിറിക്കൽ വീഡിയോ ടോവിനോ തോമസിന്റെ ഫേസ്ബുക്ക് പേജിലൂടെയാണ് പുറത്തിറക്കിയത്. ബിജു നാരായണനും സംഘവുമാണ് ഗാനം ആലപിച്ചിരിക്കുന്നത്. രഞ്ജിൻ രാജ് സംഗീത സംവിധാനം നിർവഹിച്ചിരിക്കുന്ന ഗാനത്തിന്റെ വരികൾ സന്തോഷ്‌ വർമയുടേതാണ്.
ചിത്രത്തിലെ സുപ്രധാന രംഗമാണ് ക്രിസ്മസ് കരോൾ. ക്രിസ്മസ് കാലത്ത് എല്ലാ മതസ്ഥരും ലോകമെമ്പാടും കരോളിൽ പങ്കെടുക്കാറുണ്ട്. ഈ ചിത്രത്തിൻ്റെ ചിത്രീകരണം ക്രിസ്മസ് കാലത്തു തന്നെ നടക്കുന്നതിനാൽ ഈ കരോൾ ഗാനത്തിന് ഏറെ പ്രസക്തിയുണ്ട്. ഇതിനകം സോഷ്യൽ മീഡിയായിൽ വലിയ തരംഗമാണു ഈ ഗാനം സൃഷ്ടിച്ചിരിക്കുന്നത്.
വിഷ്ണു ഉണ്ണികൃഷ്ണൻ നായകനാകുന്ന ചിത്രത്തിൽ അനുശ്രീയും ബംഗാളി നടി മോഷയുമാണു നായികമാർ. സലിം കുമാർ, ജോണി ആൻ്റണി, പ്രേംകുമാർ, ശ്രീകാന്ത് മുരളി, രാജേഷ് മാധവ്, ജയൻ ചേർത്തല, നോബി, ജയപ്രകാശ് കുളൂർ, മാലാ പാർവ്വതി എന്നിവരും പ്രധാന താരങ്ങളാണ്. ഛായാഗ്രഹണം: രതീഷ് റാം, നിർമ്മാണ നിർവ്വഹണം രാജേഷ് തിലകം. ഈസ്റ്റ് കോസ്റ്റ് കമ്മ്യൂണിക്കേഷൻസ് നിർമ്മിക്കുന്ന ഈ സിനിമയുടെ ചിത്രീകരണം പാലക്കാടൻ ഗ്രാമങ്ങളിൽ പുരോഗമിക്കുന്നു.
♦ എഴുത്ത്: വാഴൂർ ജോസ്
