ദുബായ് ഡ്യൂട്ടി ഫ്രീയുടെ മില്ലേനിയം മില്യണയർ സീരീസ് 407 നറുക്കെടുപ്പിൽ ദുബായിൽ താമസിക്കുന്ന മലയാളി എട്ടു കോടിയിലേറെ രൂപ (10 ലക്ഷം ഡോളർ) സമ്മാനം നേടി. ജയകൃഷ്ണൻ( 46) എന്ന വ്യക്തിയെയാണു ഭാഗ്യം അനുഗ്രഹിച്ചത്.
നവംബർ എട്ടിന് ഭാര്യയോടും രണ്ടു മക്കളോടുമൊപ്പം ലണ്ടനിലേക്കു പോകുന്നതിനിടെ ദുബായ് വിമാനത്താവളത്തിൽ നിന്നാണു ജയകൃഷ്ണൻ ടിക്കറ്റ് വാങ്ങിയത്. ദെയ്‌റയിലെ ഇന്റഗ്രൽടെക് നെറ്റ്‌വർക്ക്സ് എൽഎൽസിയുടെ ഓപറേഷൻസ് മാനേജരായി ജോലി ചെയ്യുന്ന ഇദ്ദേഹം പതിവായി ദുബായ് ഡ്യൂട്ടി ഫ്രീ പ്രമോഷനുകളിൽ പങ്കെടുക്കുണ്ട്. പക്ഷേ സമ്മാനം ലഭിക്കുന്നത് ഇതാദ്യമായാണ്.
മില്ലേനിയം മില്യണയർ നറുക്കെടുപ്പിനെ തുടർന്നു രണ്ട് ആഡംബര വാഹനങ്ങൾക്കായുള്ള ഫൈനസ്റ്റ് സർപ്രൈസ് നറുക്കെടുപ്പും നടന്നു. ജർമൻ സ്വദേശി റെയ്‌നർ ബോഥേൺ, നവംബർ 11ന് ഓൺലൈനിൽ വാങ്ങിയ ഫൈനെസ്റ്റ് സർപ്രൈസ് മെഴ്‌സിഡസ് ബെൻസ് ജി 63 ആഡംബര കാർ സമ്മാനം നേടി. ദുബായിൽ ജോലി ചെയ്യുന്ന 43 കാരനായ റഷ്യൻ പൗരൻ വിറ്റാലികാരി നവംബർ 14ന് ഓൺലൈനിൽ വാങ്ങിയ ടിക്കറ്റ് വഴി ബിഎംഡബ്ല്യു ആർ 9T പ്യുവർ ആഡംബര മോട്ടോർബൈക്കും സ്വന്തമാക്കി.
