ഭര്ത്താവിനെ കസ്റ്റഡിയില് എടുത്തതിന് പോലീസ് സ്റ്റേഷനിലെത്തി; ഗര്ഭിണിയായ യുവതിയുടെ മുഖത്തടിച്ച് സിഐ 2024 ല് നടന്ന സംഭവത്തിന്റെ ദൃശ്യങ്ങള് കോടതി ഇടപെടലില് പുറത്തുവന്നു
കൊച്ചി: ഭര്ത്താവിനെ കസ്റ്റഡിയില് എടുത്തതിന് പിന്നാലെ സ്റ്റേഷനില് എത്തിയ ഗര്ഭിണിയായ ഭാര്യയെ മുഖത്തടിച്ച് സിഐ. നെഞ്ചില് പിടിച്ച് തള്ളുകയും ചെയ്തു. എറണാകുളം നോര്ത്ത് പൊലീസ് സ്റ്റേഷനില് 2024 ല് നടന്ന സംഭവത്തിന്റെ ദൃശ്യങ്ങള് പുറത്തുവന്നു. സിഐ പ്രതാപചന്ദ്രനാണ് യുവതിയെ മര്ദിച്ചത്. ഷൈമോള് എന്ന യുവതിക്കായിരുന്നു മര്ദനമേറ്റത്.
ഹൈക്കോടതിയുടെ ഇടപെടലുകളിലൂടെ പരാതിക്കാരിക്ക് ലഭിച്ച ദൃശ്യങ്ങള് പുറത്തുവന്നു. ഇതില് സിഐ യുവതിയുടെ മുഖത്തടിക്കുന്നത് വ്യക്തമാണ്. വീടിന് സമീപത്തെ ഒരു സ്ഥാപനത്തില് രണ്ട് പേര് തമ്മില് പ്രശ്നമുണ്ടായിരുന്നുവെന്നും അവരെ പൊലീസ് എത്തി പിടിച്ചുകൊണ്ടുപോയതായും ഷൈമോളുടെ ഭര്ത്താവ് പറഞ്ഞു. രക്ഷിക്കണം എന്ന് പറഞ്ഞ് അവര് നിലവിളിക്കുന്നുണ്ടായിരുന്നു. ഇത് കേട്ട് താനും ഭാര്യയും അവിടേയ്ക്ക് പോയി.
തങ്ങളെ കണ്ട പൊലീസുകാര് അവിടെ നിന്ന് പോകണമെന്ന് ആവശ്യപ്പെട്ടു. തുടര്ന്ന് തങ്ങള് അവിടെ നിന്ന് മാറി നില്ക്കുകയും ദൃശ്യങ്ങള് പകര്ത്തുകയും ചെയ്തു. ഇതാണ് പ്രശ്നമായത്. തൊട്ടടുത്ത ദിവസം എഫ്ഐആര് പോലുമിടാതെ തന്നെ പിടിച്ചുകൊണ്ടുപോകുക യായിരുന്നു. ഡ്യൂട്ടി തടസപ്പെടുത്താന് ശ്രമിച്ചു എന്നാണ് അവര് പറഞ്ഞത്.
സ്റ്റേഷനില് നിന്ന് തങ്ങളുടെ വീട്ടിലേയ്ക്ക് അധികം ദൂരമില്ല. പറഞ്ഞാല് ഹാരജാരാ കാവുന്നതേ ഉണ്ടായിരുന്നുള്ളൂ. എന്നാല് യാതൊരു അറിയിപ്പുമില്ലാതെ പിടിച്ചുകൊണ്ടു പോയി മര്ദിക്കുകയായിരുന്നു. തന്നെ പിടിച്ചുകൊണ്ടുപോകുന്നതുകണ്ടാണ് ഷൈമോള് സ്റ്റേഷനിലേക്ക് എത്തിയത്. അവള് നേരിട്ടത് ക്രൂരമര്ദനമാണെന്നും ഭര്ത്താവ് പറഞ്ഞു.
