എസ്ഐആറിനെ ഏതു രീതിയിലും എതിര്ക്കുമെന്ന് ഭരണപക്ഷവും പ്രതിപക്ഷവും ; ഇക്കാര്യത്തില് രണ്ടു കൂട്ടരും ഒറ്റക്കെട്ട് ; നിയമപരമായി തന്നെ സര്ക്കാര് ചോദ്യം ചെയ്യാന് സര്വകക്ഷി യോഗത്തില് തീരുമാനം
തിരുവനന്തപുരം: തീവ്രവോട്ടര് പട്ടിക പരിഷ്ക്കരണത്തെ കക്ഷിഭേദമെന്യേ എതിര്ക്കുന്ന ഇടതുപക്ഷവും യുഡിഎഫും എസ്ഐആറിനെ നിയമപരമായി നേരിടാന് സര്വകക്ഷിയോഗത്തില് തീരുമാനം. കേരളത്തില് വോട്ടര് പട്ടികയുടെ തീവ്ര പരിശോധന (എസ് ഐ ആര്) നടപ്പാക്കുന്നത് നിയമപരമായി ചോദ്യം ചെയ്യാന് മുഖ്യമന്ത്രി പിണറായി വിജയന്റെ അധ്യക്ഷതയില് ചേര്ന്ന സര്കക്ഷി യോഗത്തില് തീരുമാനം എടുത്തു. ബിജെപി ഒഴികെയുള്ള പ്രധാന രാഷ്ട്രീയ കക്ഷികളെല്ലാം ഈ ആവശ്യം ഉന്നയിക്കുന്നുണ്ട്
കഴിഞ്ഞ ലോക്സഭാ തെരഞ്ഞെടുപ്പ് സമയത്ത് പുതുക്കിയ വോട്ടര്പട്ടിക നിലവിലിരിക്കെ 2002ലെ പട്ടിക അടിസ്ഥാനമാക്കി തീവ്രവോട്ടര് പട്ടിക പരിഷ്ക്കരണം നടപ്പാക്കാനുള്ള നീക്കം അശാസ്ത്രീയവും ദുരുദ്ദേശപരവുമാണെന്നും മുഖ്യമന്ത്രി പറഞ്ഞു. മുഖ്യമന്ത്രി പങ്കുവെച്ച ഉത്കണ്ഠയോട് പൂര്ണമായും യോജിക്കുന്നവെന്നും കോടതിയില് പോയാല് കേസില് കക്ഷിചേരാന് തയ്യാറാണെന്നും പ്രതിപക്ഷ നേതാവ് വി ഡി സതീശന് പറഞ്ഞു. തമിഴ്നാട് മാതൃകയില് സംസ്ഥാന സര്ക്കാര് തന്നെ കോടതിയെ സമീപിക്കണമെന്നായിരുന്നു യോഗത്തിലെ നിര്ദേശം. സംസ്ഥാന സര്ക്കാര് തന്നെ കോടതിയെ സമീപിക്കണമെന്നാണ് ആവശ്യം.
എസ്ഐആറില് സുപ്രിംകോടതിയെ സമീപിക്കണമെന്നായിരുന്നു സര്വകക്ഷി യോഗത്തില് ഉയര്ന്ന ആവശ്യം. യോഗത്തില് പങ്കെടുത്ത ബിജെപി ഒഴികെയുള്ള കക്ഷികള് സര്ക്കാര് തീരുമാനത്തെ പൂര്ണമായും പിന്തുണച്ചു. തദ്ദേശ സ്വയംഭരണ സ്ഥാപന തിരഞ്ഞെടുപ്പ് അടുത്തിരിക്കുന്ന പശ്ചാത്തലത്തില് എസ്ഐആര് ചോദ്യം ചെയ്യാനുള്ള നിയമോപദേശം സര്ക്കാര് എന്ന നിലയിലും രാഷ്ട്രീയ പാര്ട്ടി എന്ന നിലയിലും തേടുമെന്നും മുഖ്യമന്ത്രി യോഗത്തെ അറിയിച്ചു.
