ആത്മഹത്യ ചെയ്ത കോണ്ഗ്രസ് നേതാവിന്റെ വീട്ടില് എത്തിയില്ല; പ്രിയങ്കയെ ഹോട്ടലില് എത്തി കണ്ട് ജോസ് നെല്ലേടത്തിന്റെ കുടുംബം, ‘ഒപ്പ’മുണ്ടാകുമെന്ന് ഉറപ്പ്
വയനാട്: പുല്പ്പള്ളിയില് ആത്മഹത്യ ചെയ്ത കോണ്ഗ്രസ് നേതാവ് ജോസ് നെല്ലേടത്തിന്റെ കുടുംബാംഗങ്ങള് കോണ്ഗ്രസ് നേതാവും എംപിയുമായ പ്രിയങ്ക ഗാന്ധിയെ കണ്ടു. പ്രിയങ്ക താമസിക്കുന്ന ഹോട്ടലില് വച്ചായിരുന്നു കൂടിക്കാഴ്ച. ജോസ് നെല്ലേടത്തിന്റെ ഭാര്യയും മകനും മകളുമാണ് പ്രിയങ്കയെ കണ്ടത്. ഒപ്പമുണ്ടാകുമെന്ന് പ്രിയങ്ക, ജോസ് നെല്ലേടത്തിന്റെ കുടുംബത്തിന് ഉറപ്പുനല്കി. വ്യക്തിപരമായ കാര്യങ്ങള് മാത്രമാണ് സംസാരിച്ചതെന്നും പരസ്യപ്രതികരണത്തിന് ഇല്ലെന്നും ജോസിന്റെ കുടുംബം പറഞ്ഞു.
സ്ഥലത്തുണ്ടായിരുന്നിട്ടും, ആത്മഹത്യ ചെയ്ത കോണ്ഗ്രസ് പഞ്ചായത്ത് അംഗം ജോസ് നെല്ലേടത്തിന്റെ വീട്ടില് പ്രിയങ്ക എത്തിയിരുന്നില്ല. ഇതിനെതിരെ കോണ്ഗ്രസിലെ ഒരുവിഭാഗം രംഗത്തെത്തിയിരുന്നു. അതിനിടെയാണ് ജോസിന്റെ കുടുംബം പ്രിയങ്കയെ ഹോട്ടലില് എത്തി സന്ദര്ശിച്ചത്. ജോസ് നെല്ലേടത്തെ ആത്മഹത്യയിലേക്ക് നയിച്ച കാരണങ്ങള് പാര്ട്ടിയിലെ ഗ്രൂപ്പ് പോരാണെന്ന കാര്യം ഇവര് പ്രിയങ്കയെ അറിയിച്ചതായാണ് വിവരം.
സെപ്റ്റംബര് 12നാണ് ജോസ് നെല്ലേടത്തെ മരിച്ച നിലയില് കണ്ടെത്തിയത്. വയനാട് പുല്പ്പള്ളിയിലെ പ്രാദേശിക നേതാവായ തങ്കച്ചനെ കള്ളക്കേസില് ആരോപണവിധേയനാണ് ജോസ് നെല്ലേടം. വീടിന് അടുത്തുള്ള കുളത്തിലാണ് മരിച്ച നിലയില് കണ്ടെത്തിയത്. തങ്കച്ചന്റെ വീട്ടില് നിന്ന് മദ്യവും സ്ഫോടക വസ്തുക്കളും കണ്ടെത്തിയ സംഭവത്തിന് പിന്നില് ജോസ് നെല്ലേടം ഉള്പ്പെടെയുള്ളവരാണെന്ന് തങ്കച്ചന് ആരോപിച്ചിരുന്നു. കേസിലെ ഗൂഢാലോചനയില് അന്വേഷണം നടക്കുന്നതിനിടെയാണ് സംഭവം.
