കര്ണാടകയില് വെട്ടിനിരത്തിയെങ്കില് മഹാരാഷ്ട്രയില് കൂട്ടിച്ചേര്ത്തു; വോട്ടുകൊള്ളയ്ക്ക് സഹായി തിരഞ്ഞെടുപ്പ് കമ്മിഷന്! ഗുരുതര ആരോപണങ്ങളുമായി രാഹുല് വീണ്ടും
ന്യൂഡല്ഹി: കേന്ദ്ര തിരഞ്ഞെടുപ്പ് കമ്മിഷണര് ഗ്യാനേഷ് കുമാറിനെതിരെ ഗുരുതര ആരോപണവുമായി വീണ്ടും ലോക്സഭ പ്രതിപക്ഷ നേതാവ് രാഹുല് ഗാന്ധി. വോട്ടുകൊള്ള നടത്തുന്നവരെ സഹായിക്കുകയാണ് തിരഞ്ഞെടുപ്പ് കമ്മിഷന് ചെയ്യുന്നതെന്നു രാഹുല് വിമര്ശിച്ചു. എഐസിസി ആസ്ഥാനത്ത് നടത്തിയ വാര്ത്തസമ്മേളനത്തിലാണ് രാഹുലിന്റെ ആരോപണങ്ങള്.
വോട്ടുകൊള്ളയ്ക്ക് 101 ശതമാനം തെളിവുണ്ടെന്നു രാഹുല് പറഞ്ഞു. കര്ണാടകയിലെ അലന്ദ് മണ്ഡലത്തില് കോണ്ഗ്രസിനു വോട്ടു ചെയ്യുന്ന 6018 വോട്ടര്മാരെ ആസൂത്രിതമായി നീക്കിയെന്നു പറഞ്ഞ രാഹുല് വോട്ട് നഷ്ടപ്പെട്ടവരെ വേദിയിലെത്തിക്കുകയും ചെയ്തു. വോട്ടുകൊള്ളയില് അന്വേഷണത്തിനായി മുഴുവന് വിവരങ്ങളും നല്കാന് തിരഞ്ഞെടുപ്പ് കമ്മിഷന് കര്ണാടക സിഐഡി നിരവധി തവണ കത്ത് നല്കി. എന്നാല്, തിരഞ്ഞെടുപ്പ് കമ്മിഷന് വിവരം നല്കിയില്ല. കര്ണാടകയിലെ വിവരം ഒരാഴ്ചക്കകം തിരഞ്ഞെടുപ്പ് കമ്മിഷന് സിഐഡിക്ക് നല്കണമെന്നും രാഹുല് പറഞ്ഞു.
മഹാരാഷ്ട്രയിലെ രജൂര മണ്ഡലത്തില് 6850 വ്യാജ വോട്ടുകളാണ് ചേര്ത്തത്. കര്ണാടകയിലെ അലന്ദ് മണ്ഡലത്തില് ഒഴിവാക്കലാണ് നടന്നതെങ്കില് മഹാരാഷ്ട്രയിലെ രജൂരയില് കൂട്ടിച്ചേര്ക്കലാണ് നടന്നത്. പല പേരുകളിലും നമ്പറുകളിലുമായി കൃത്യമല്ലാതെയാണ് കൂട്ടിച്ചേര്ക്കപ്പെട്ടവരുടെ വിവരമുള്ളത്. വ്യാജ ലോഗിന് ഉപയോഗിച്ചാണ് തട്ടിപ്പു നടക്കുന്നത്. പട്ടികയില് നിന്ന് ഒഴിവാക്കുന്നതും കൂട്ടിച്ചേര്ക്കുന്നതും വോട്ടര്മാര് അറിയുന്നില്ല രാഹുല് ആരോപിച്ചു.
