നിക്കിയുടെ കുടുംബം തന്നെ സ്ത്രീധനത്തിന് വേണ്ടി പീഡിപ്പിച്ചിരുന്നെന്ന് നാത്തൂന്റെ വെളിപ്പെടുത്തല് ; ഗ്രേറ്റര് നോയിഡയില് യുവതിയെ തീകൊളുത്തി കൊന്ന സ്ത്രീധനപീഡനക്കേസില് പുതിയ ട്വിസ്റ്റ്
ലക്നൗ: ഗ്രേറ്റര് നോയിഡയിലെ സ്ത്രീധന മരണക്കേസില് പുതിയ ട്വിസ്റ്റ് സൃഷ്ടിച്ചുകൊണ്ട് കൊല്ലപ്പെട്ട യുവതിയുടെ കുടുംബത്തിനെതിരെയും ഗുരുതര ആരോപണങ്ങള്. നിക്കിയുടെ സഹോദരന്റെ ഭാര്യയാണ് ഇപ്പോള് നിക്കിയുടെ കുടുംബത്തിനെതിരേ ആരോപണം ഉന്നയിച്ചിരിക്കുന്നത്. തനിക്കെതിരേ നിക്കിയുടെ മാതാപിതാക്കളും ഭര്ത്താവും സ്ത്രീധനപീഡനം നടത്തിയിരുന്നതായിട്ടാണ് ആരോപണം.
നിക്കിയുടെ സഹോദരന് രോഹിത്തിന്റെ ഭാര്യയാണ് മീനാക്ഷി. നിക്കിയുടെ അച്ഛനും സഹോദരനും തന്നോട് സ്ത്രീധന പീഡനം നടത്താറുണ്ടെന്ന് അവര് ആരോപണം ഉന്നയിച്ചു. 2016-ല് രോഹിത്തിനെ വിവാഹം കഴിച്ച മീനാക്ഷി, നിക്കിയുടെ കുടുംബം തന്നെ സ്ത്രീധന ത്തിന്റെ പേരില് ഉപദ്രവിച്ചിരുന്നുവെന്ന് ആരോപിച്ചു. തന്റെ വിവാഹ സമയത്ത് അച്ഛന് ഒരു മാരുതി സുസുക്കി സിയാസ് കാറും 31 പവന് സ്വര്ണ്ണവും നല്കിയിരുന്നു വെങ്കിലും, നിക്കി യുടെ കുടുംബം ഒരു സ്കോര്പിയോ എസ്.യു.വി ആവശ്യപ്പെട്ടിരുന്നുവെന്ന് മീനാക്ഷി പറഞ്ഞു.
മീനാക്ഷിയുടെ വാക്കുകള് അനുസരിച്ച്, നിക്കിയും അവളുടെ സഹോദരി കാഞ്ചനും തന്നെ നിരന്തരം പീഡിപ്പിച്ചിരുന്നു. ‘നിക്കിയും കാഞ്ചനും എന്നെ അടിക്കാറുണ്ടായിരുന്നെന്നും മീനാക്ഷി പറഞ്ഞു. കൂടാതെ, ഭര്തൃമാതാവും നിക്കിയുടെ പിതാവ് ഭിഖാരി സിംഗും തന്നെ ഉപദ്രവിച്ചിരുന്നതായും അവര് ആരോപിച്ചു. ഭര്ത്താവ് രോഹിത് തന്നെ മര്ദ്ദിച്ചിരുന്നെന്നും, ഒരിക്കല് തന്റെ സഹോദരനു നേരെ വെടിയുതിര്ത്തെന്നും മീനാക്ഷി ആരോപിച്ചു. തന്നെ നിര്ബന്ധിച്ച് രണ്ട് തവണ ഗര്ഭഛിദ്രം ചെയ്യിച്ചതായും അവര് പറഞ്ഞു.
നേരത്തേ നിക്കിഭട്ടിന്റെ സ്ത്രീധന മരണത്തില് ഭര്ത്താവ് വിപിനെതിരേ നിക്കിയുടെ കുടുംബം രംഗത്ത് വന്നിരുന്നു. എന്നാല് വിപിന്റെ വീട്ടുകാരെക്കുറിച്ച് സംസാരിച്ച മീനാക്ഷി, ‘അവര് അങ്ങനെയല്ല, വളരെ നല്ല കുടുംബമാണ്’ എന്ന് വ്യക്തമാക്കി. മീനാക്ഷിയുടെ ആരോപണങ്ങളെ പിന്തുണച്ച് 2024-ല് അവളുടെ സഹോദരന് ദീപക് ഭാട്ടി ഒരു എഫ്.ഐ.ആര് ഫയല് ചെയ്തിട്ടുണ്ട്.
എന്നാല് ആരോപണങ്ങള് നിഷേധിച്ച് ഭിഖാരി സിംഗ് പറഞ്ഞു, ‘എന്റെ മകന് ഒരിക്കലും അവളെ കൈകൊണ്ട് പോലും തൊട്ടിട്ടില്ല. സ്വന്തം മകളെ വീട്ടിലെത്തിക്കാന് വരുന്ന ഒരു കുടുംബം അവളുടെ ഭര്ത്താവിന്റെ കുടുംബത്തെ ആക്രമിക്കുമോ? എന്റെ കൈയില് എല്ലാ തെളിവുകളുമുണ്ട്. അവള്ക്ക് വേണ്ടി ഞങ്ങളുടെ വാതില് എപ്പോഴും തുറന്നിരിക്കും.’ നിക്കിയുടെ കേസില് ഞെട്ടിക്കുന്ന വിവരങ്ങള് പുറത്തുവന്നുകൊണ്ടിരിക്കുമ്പോഴാണ് ഈ പുതിയ വഴിത്തിരിവ്.
അവളുടെ ഭര്ത്താവ് വിപിനും കുടുംബവും 20 വയസ്സിനടുത്ത് പ്രായമുള്ള നിക്കിയെ അവളുടെ കൊച്ചുമകന്റെയും സഹോദരിയുടെയും മുന്നില് വെച്ച് പീഡിപ്പിക്കുകയും തീകൊളുത്തുകയും ചെയ്തു എന്നാണ് ആരോപണം. നിക്കിയുടെ ആറ് വയസ്സുകാരന് മകന് പറഞ്ഞത്, ‘എന്റെ അമ്മയുടെ ദേഹത്ത് എന്തോ ഒഴിച്ചു, എന്നിട്ട് അവളെ അടിച്ചു, അതിനുശേഷം ലൈറ്റര് കൊണ്ട് തീകൊളുത്തി’ എന്നാണ്.
സംഭവത്തിന്റെ രണ്ട് ഭയാനകമായ വീഡിയോകള് ഓണ്ലൈനില് പ്രചരിച്ചിരുന്നു. അതിലൊന്നില് നിക്കിയെ മര്ദ്ദിക്കുന്നതും മുടിക്ക് കുത്തിപ്പിടിച്ച് വലിച്ചിഴക്കുന്നതും കാണാം. മറ്റൊന്നില് തീകൊളുത്തിയ ശേഷം അവള് ഗോവണിപ്പടികള് ഇറങ്ങാന് ശ്രമിക്കുന്നതും കാണാം. ഈ വീഡിയോ പകര്ത്തിയ നിക്കിയുടെ മൂത്ത സഹോദരി കാഞ്ചന്റെ പരാതിയുടെ അടിസ്ഥാനത്തില് പോലീസ് വിപിനും കുടുംബത്തിനുമെതിരെ എഫ്.ഐ.ആര് ഫയല് ചെയ്തു.
പോലീസ് കസ്റ്റഡിയിലിരിക്കെ സിര്സ ചൗരഹയ്ക്ക് സമീപം ഒരു ഇന്സ്പെക്ടറുടെ കൈയില് നിന്ന് പിസ്റ്റള് തട്ടിയെടുത്ത് രക്ഷപ്പെടാന് ശ്രമിക്കുന്നതിനിടെ വിപിന് കാലില് വെടിയേറ്റു. നിക്കിയെ തീകൊളുത്താന് ഉപയോഗിച്ച പെട്രോള് കുപ്പികള് കണ്ടെത്താന് കൊണ്ടുപോകുമ്പോഴാണ് ഇത് സംഭവിച്ചതെന്ന് പോലീസ് പറഞ്ഞു. പരിക്കേറ്റിട്ടും വിപിന് യാതൊരു കുറ്റബോധവും കാണിച്ചില്ല.
‘എനിക്ക് കുറ്റബോധമില്ല. ഞാനല്ല അവളെ കൊന്നത്. അവള് സ്വയം മരിച്ചതാണ്,’ വിപിന് അവകാശപ്പെട്ടു. ഭാര്യയെ മര്ദ്ദിച്ചതിനെക്കുറിച്ച് ചോദിച്ചപ്പോള്, ‘ഭാര്യയും ഭര്ത്താവും തമ്മില് വഴക്കുണ്ടാകുന്നത് വളരെ സാധാരണമാണ്,’ എന്ന് അവന് പറഞ്ഞു. ആശുപത്രിയിലേക്ക് കൊണ്ടുപോകുന്ന വഴിക്ക് നിക്കി മരണപ്പെട്ടു. വിപിന്റെ സഹോദരന്, അമ്മ, അച്ഛന് എന്നിവരെ കേസില് അറസ്റ്റ് ചെയ്തിട്ടുണ്ട്.
