ഒറ്റത്തവണ മൂന്ന് ലിറ്റര്, ഓണ്ലൈന് മദ്യവില്പ്പനക്ക് ബെവ്കോ; താത്പര്യം പ്രകടിപ്പിച്ച് സ്വിഗ്ഗിയടക്കം
തിരുവനന്തപുരം: ആപ്പിലൂടെ ബുക്ക് ചെയ്യുന്നവര്ക്ക് മദ്യം വീട്ടിലെത്തിക്കാന് അനുമതി നല്കണമെന്ന് ബിവറേജസ് കോര്പ്പറേഷന്റെ ശുപാര്ശ. ഓണ്ലൈന് ഡെലിവറി കമ്പനിയായ സ്വിഗ്ഗി പദ്ധതിയോട് താല്പര്യം അറിയിച്ചിട്ടുണ്ട്.
ബുക്ക് ചെയ്യുന്നവര്ക്ക് മദ്യം വീട്ടിലെത്തിക്കാന് സഹായിക്കുന്ന മൊബൈല് ആപ്പ് വികസിപ്പിക്കുന്ന പ്രവര്ത്തനങ്ങളിലാണ് ബെവ്കോ. മൂന്ന് വര്ഷമായി ഇക്കാര്യം സംബന്ധിച്ച് സര്ക്കാരിനു ശുപാര്ശ നല്കുന്നുണ്ട്. അനുകൂല തീരുമാനം ഉണ്ടായാല് വാതില്പ്പടി മദ്യവിതരണം ആരംഭിക്കുമെന്നും ബെവ്കോ അറിയിച്ചു.
23 വയസ്സ് പൂര്ത്തിയായവര്ക്കു മാത്രം മദ്യം നല്കാനാണ് ശുപാര്ശ. തിരിച്ചറിയല് കാര്ഡുകള് നോക്കി ഇക്കാര്യം ഉറപ്പാക്കും. ഒരു തവണ മൂന്നു ലിറ്റര് മദ്യം ഓര്ഡര് ചെയ്യാം. മദ്യം ഓര്ഡര് ചെയ്തു കരിഞ്ചന്തയില് വില്ക്കുന്നത് ഒഴിവാക്കാന് മദ്യം വാങ്ങുന്നതിനു പരിധി നിശ്ചയിക്കും. കൂടുതല് വിതരണ കമ്പനികള് രംഗത്തെത്തിയാല് ടെന്ഡര് വിളിക്കും. മദ്യ വിതരണത്തിന്റെ പൂര്ണ ഉത്തരവാദിത്തം വിതരണ കമ്പനിക്കായിരിക്കും.
കോവിഡ് കാലത്ത് മദ്യം ഓണ്ലൈനിലൂടെ വിതരണം ചെയ്യാന് സര്ക്കാര് തീരുമാനിച്ചിരുന്നു. തിരക്ക് ഒഴിവാക്കാന് ആപ്പിലൂടെയായിരുന്നു ബുക്കിങ്. ഇതിനുശേഷം വാതില്പ്പടി മദ്യവിതരണം ആലോചിച്ചെങ്കിലും ചര്ച്ചകള് മുന്നോട്ടുപോയില്ല. സര്ക്കാരും വേണ്ടത്ര താല്പര്യം കാണിച്ചില്ല.
