ഇരിക്കട്ടെ ഈ ഇരുട്ടടി!!! ഇന്ത്യയ്ക്കെതിരേ വന് നീക്കവുമായി ട്രംപിന്റെ പ്രഖ്യാപനം; 25% താരിഫ് കൂടി പ്രഖ്യാപിച്ചു, മൊത്തം 50%
വാഷിങ്ടണ്: ഇന്ത്യക്കെതിരെ വമ്പന് നീക്കവുമായി അമേരിക്കന് പ്രസിഡന്റ് ഡൊണാള്ഡ് ട്രംപ്. റഷ്യയില് നിന്ന് എണ്ണ ഇറക്കുമതി ചെയ്യുന്നതിന് ഇന്ത്യക്ക് മേല് 25 ശതമാനം അധിക താരിഫ് ഏര്പ്പെടുത്തി. ഇതോടെ ഇന്ത്യക്ക് മേലുള്ള അമേരിക്കന് താരിഫ് 50 ശതമാനമായി ഉയരും. ഇതുസംബന്ധിച്ച ഉത്തരവില് ട്രംപ് ഒപ്പുവെച്ചതായി വൈറ്റ് ഹൗസ് വൃത്തങ്ങള് അറിയിച്ചു.
യുക്രെയ്ന് അധിനിവേശത്തിന്റെ പശ്ചാത്തലത്തില് റഷ്യക്ക് മേല് അമേരിക്കയും സഖ്യകക്ഷികളും ഉപരോധം ഏര്പ്പെടുത്തിയിരുന്നു. ഇതിനിടെ റഷ്യയില് നിന്ന് വന്തോതില് ഇന്ത്യ ക്രൂഡ് ഓയില് ഇറക്കുമതി ചെയ്തതാണ് അമേരിക്കയെ ചൊടിപ്പിച്ചത്. ഇത് വഴി റഷ്യയെ ഇന്ത്യ സഹായിക്കുന്നുവെന്നാണ് ട്രംപിന്റെ ആരോപണം.
നേരത്തെ ഇന്ത്യയുടെ ചരക്കുകള്ക്ക് അമേരിക്ക 25 ശതമാനം താരിഫ് ഏര്പ്പെടുത്തിയിരുന്നു. ഇതിന് പുറമെയാണ് പുതിയ 25 ശതമാനം അധിക താരിഫ് ഏര്പ്പെടുത്തിയത്. ഇത് ഇന്ത്യയുടെ സാമ്പത്തിക മേഖലയ്ക്ക് വലിയ വെല്ലുവിളിയാകും.
