വാര്ത്ത പിന്വലിച്ച് കാന്തപുരം!!! ‘നിമിഷപ്രിയയുടെ വധശിക്ഷ ഒഴിവാക്കി’ എന്ന് ‘എക്സി’ല് ഷെയര് ചെയ്ത വാര്ത്ത ഡിലീറ്റ് ചെയ്തു
കോഴിക്കോട്: മലയാളി നഴ്സ് നിമിഷ പ്രിയയുടെ വധശിക്ഷ ഒഴിവാക്കി എന്ന വാര്ത്ത പിന്വലിച്ചു കാന്തപുരം എ പി അബൂബക്കര് മുസ്ലിയാര്. സോഷ്യല് മീഡിയ പ്ലാറ്റ്ഫോമായ എക്സില് ഷെയര് ചെയ്ത വാര്ത്തയാണ് ഡിലീറ്റ് ചെയ്തത്. വധശിക്ഷ ഒഴിവാക്കി എന്ന വാര്ത്തയാണ് കാന്തപുരം എക്സില് പങ്കുവെച്ചിരുന്നത്. കാന്തപുരം ഓഫീസിനെ കോട്ട് ചെയ്തുള്ള വാര്ത്ത ഏജന്സിയുടെ വാര്ത്ത ആണ് ഷെയര് ചെയ്തിരുന്നത്. ഈ വാര്ത്തയാണ് ഡിലീറ്റ് ചെയ്തിട്ടുള്ളത്. നിമിഷ പ്രിയയുടെ വധശിക്ഷ നീട്ടിവെച്ചതടക്കമുള്ള വാര്ത്ത പുറത്ത് വന്നതിന് പിന്നാലെ കാന്തപുരത്തിന്റെ ഇടപെടലിനെ ചൊല്ലി വലിയ അവകാശവാദങ്ങളും തര്ക്കങ്ങളും നടന്നിരുന്നു.
അതേസമയം, വധശിക്ഷ റദ്ദാക്കാന് ധാരണയായെന്ന വാര്ത്ത കേന്ദ്ര സര്ക്കാര് സ്ഥിരീകരിച്ചിട്ടില്ല. കൂടുതല് വിവരങ്ങള് കിട്ടിയ ശേഷം പ്രതികരിക്കാം എന്നാണ് സര്ക്കാര് വൃത്തങ്ങള് വ്യക്തമാക്കുന്നത്. വധശിക്ഷ റദ്ദാക്കിയെന്ന വാര്ത്ത തെറ്റാണെന്ന് യമനിലെ സാമൂഹ്യ പ്രവര്ത്തകന് സാമുവല് ജെറോം വ്യക്തമാക്കി. എന്നാല് നിമിഷ പ്രിയയുടെ വധശിക്ഷ റദ്ദാക്കാന് ധാരണയായെന്നും ഇക്കാര്യത്തില് യെമനില് നിന്ന് സ്ഥിരീകരണം ലഭിച്ചെന്നുമാണ് യെമനിലെ സൂഫി പണ്ഡിതന്റെ ശിഷ്യനായ ജവാദ് മുസ്തഫാവി അവകാശപ്പെട്ടത്.
