വെള്ളത്തിലും കരയിലുമായി ജീവിക്കുന്ന മുതലകളെ കാണാത്തവര്‍ ചുരുക്കമാണ്. മനുഷ്യനെ വരെ ആക്രമിക്കുന്ന ഇവയെ പലര്‍ക്കും പേടിയാണ്. എന്നാല്‍ മുതലകള്‍ക്ക് മരം കയറാനുള്ള കഴിവില്ലെന്ന് കരുതിയെങ്കില്‍ അത് നൂറു ശതമാനം ശരിയല്ല. എന്തുകൊണ്ടെന്നാല്‍ചില വര്‍ഗത്തില്‍പെട്ട മുതലകള്‍ക്ക് മരത്തില്‍ കയറാന്‍ സാധിക്കുമെന്നാണ് ഉഭയ ജീവികളെ കുറിച്ചുള്ള പഠനങ്ങള്‍ വെളിപ്പെടുത്തുന്നത്.
ഇവയ്ക്ക് ദിവസവും ഇതു ചെയ്യാന്‍ കഴിയുമെന്നും ഗവേഷകര്‍ പറയുന്നു. ആഫ്രിക്ക, ഓസ്‌ട്രേലിയ, വടക്കേ അമേരിക്ക എന്നിവിടങ്ങളില്‍ കാണപ്പെടുന്ന അഞ്ച് വ്യത്യസ്തയിനം സ്പീഷീസുകളില്‍ നടത്തിയ പഠനങ്ങളില്‍ അവയ്ക്ക് ആറടിയോളം ഉയരത്തില്‍ വരെ ഇഴഞ്ഞ് കയറാന്‍ സാധിക്കുമെന്ന് തെളിഞ്ഞിരുന്നു.
അതേസമയം, പ്രായപൂര്‍ത്തി എത്താത്ത മുതലകള്‍ക്ക് വേണ്ടി വന്നാല്‍ 30 അടി ഉയരത്തില്‍ വരെ ഇഴഞ്ഞ് കയറാനും സാധിക്കുമത്രെ. ചെറിയ മുതലകള്‍ക്ക് കുത്തനെ നില്‍ക്കുന്ന മരങ്ങളില്‍ വരെ ഇഴഞ്ഞ് കയറാന്‍ സാധിക്കും. അതേ സമയം വലിയ മുതലകള്‍ക്ക് ചരിഞ്ഞ പ്രതലങ്ങളിലൂടെ മാത്രമേ മുകളിലേക്ക് ഇഴഞ്ഞ് കയറാന്‍ പറ്റൂ. ശീതരക്തമുള്ള ജീവികളില്‍ ശരീര താപനില ക്രമപ്പെടുത്താന്‍ മരം കയറ്റം സഹായിക്കുമെന്നാണ് ഗവേഷകര്‍ പറയുന്നത്. ഈ പ്രത്യേക സ്പീഷീസ് മുതലകള്‍ കാണപ്പെടുന്ന പ്രദേശങ്ങളിലെ ആളുകള്‍ക്ക് ഇക്കാര്യം നൂറ്റാണ്ടുകള്‍ മുമ്പ് തന്നെ അറിയാമായിരുന്നെങ്കിലും ഇതേ പറ്റി കാര്യമായ പഠനങ്ങള്‍ ഒന്നും തന്നെ നടന്നിട്ടില്ല. അതുകൊണ്ട് തന്നെ അധികം പേര്‍ക്കും മുതലകളുടെ ഈ പ്രത്യേകത അറിയില്ല.
