തിരുവനന്തപുരം: വേതന വര്‍ധനവുള്‍പ്പെടെ വിവിധ ആവശ്യങ്ങള്‍ ഉന്നയിച്ച് ആശമാര്‍ നടത്തുന്ന രാപകല്‍ സമരം അന്‍പതാം ദിനത്തില്‍. സമരത്തിന്റെ അടുത്തഘട്ടത്തില്‍ ഇന്ന് ആശമാര്‍ ഇന്ന് മുടി മുറിച്ച് പ്രതിഷേധിക്കും. നിരാഹാരവും വിവാദങ്ങളും അധിക്ഷേപ പരാമര്‍ശവും ഒക്കെയായി സമരത്തിന് വന്‍ ജനപിന്തുണയാണ് ലഭിച്ചത്.
50 ദിവസം അടിപതറാതെ ഒരു സമരവുമായി മുന്നോട്ട് പോവുക എന്നത് ഒട്ടും എളുപ്പമുള്ള കാര്യമല്ല. പക്ഷേ ഇവിടെ തിരുവനന്തപുരത്ത് രാവെന്നോ പകലെന്നോ ഇല്ലാതെ സെക്രട്ടേറിയറ്റിന് മുന്നില്‍ അന്‍പത് ദിവസമായി അവരുണ്ട്.. ആശാ വര്‍ക്കര്‍മാര്‍. ഓണറേറിയം 21,000 രൂപയാക്കുക, പിരിഞ്ഞുപോകുമ്പോള്‍ 5 ലക്ഷം രൂപ ആനുകൂല്യം നല്‍കുക തുടങ്ങിയ ആവശ്യങ്ങള്‍ ഉന്നയിച്ചാണ് ഫെബ്രുവരി 10 മുതല്‍ ഭരണസിരാകേന്ദ്രത്തിന് മുന്നില്‍ ആശമാര്‍ സമരമിരിക്കുന്നത്.
പിന്നാലെ മന്ത്രി വീണ ജോര്‍ജ് ചര്‍ച്ചക്ക് വിളിച്ചെങ്കിലും പരാജയപ്പെട്ടു. മഴ നനയാതിരിക്കാന്‍ കെട്ടിയ ടാര്‍പ്പോളിന്‍ ഷീറ്റ് പൊലീസ് അഴിപ്പിച്ചതോടെ സമരം കൂടുതല്‍ ശ്രദ്ധ നേടി. പിന്നാലെ പിന്തുണയുമായി കേന്ദ്രമന്ത്രി സുരേഷ് ഗോപി, പ്രതിപക്ഷ നേതാവ് വി.ഡി സതീശന്‍ ബിജെപി സംസ്ഥാന അധ്യക്ഷന്‍ കെ. സുരേന്ദ്രന്‍ തുടങ്ങി നേതാക്കള്‍ സമര പന്തലിലേക്ക് ഒഴുകിയെത്തി.
സുരേഷ് ഗോപിയുടെ സന്ദര്‍ശനത്തെ സിഐടിയു നേതാവ് കെ.എന്‍ ഗോപിനാഥ് അധിക്ഷേപിച്ചു. നിയമസഭയിലും പിന്നാലെ ലോക്‌സഭയിലും ആശമാരുടെ സമരമെത്തി. സെക്രട്ടറിയേറ്റ് ഉപരോധിച്ചു. പിന്നാലെ രണ്ടാംഘട്ട ചര്‍ച്ച.. അതിലും തീരുമാനം ആയില്ല.. ശേഷമുള്ള മന്ത്രിയുടെ ഡല്‍ഹി യാത്ര കൂടി വിവാദമാകുകയും ആശമാര്‍ നിരാഹാരം തുടങ്ങുകയും ചെയ്തതോടെ സമരം കൂടുതല്‍ ശക്തിപ്പെട്ടു.
സമരത്തിന്റെ അടുത്തഘട്ടത്തില്‍ അന്‍പതാം ദിനമായ ഇന്ന് മുടി മുറിച്ച് പ്രതിഷേധിക്കാന്‍ ആണ് തീരുമാനം. ആവശ്യങ്ങള്‍ നേടിയെടുക്കാന്‍ തല മൊട്ടയടിക്കാന്‍ തയാറെന്ന് സമരക്കാര്‍ അറിയിച്ചു. സമരം ഇത്ര നീണ്ടിട്ടും ചര്‍ച്ച ചെയ്ത് പരിഹരിക്കാന്‍ സര്‍ക്കാര്‍ തയാറാകാത്തതില്‍ ആശമാര്‍ അസ്വസ്ഥരാണ്. ആവശ്യം അംഗീകരിക്കും വരെയും സമരം എന്നാണ് നിലപാട് .
