പാലക്കാട്: മേഴത്തൂര്‍ സ്‌കൂളിലെ അധ്യാപകന്റെ കാര്‍ മോഷണംപോയ സംഭവത്തില്‍ അന്തര്‍സംസ്ഥാന വാഹനമോഷ്ടാവ് ചാലിശ്ശേരി പോലീസിന്റെ പിടിയിലായി. ആലപ്പുഴ തലവടി സ്വദേശി പുത്തന്‍പറമ്പില്‍ വിനോദ് മാത്യുവാണ് (45) 14 മാസത്തിനുശേഷം പിടിയിലാകുന്നത്.
2023 മാര്‍ച്ച് 20-ന് കൂറ്റനാട്ടെ വര്‍ക്ഷോപ്പില്‍ അറ്റകുറ്റപ്പണികള്‍ക്കായി ഏല്പിച്ച വാഹനമാണ് മോഷണംപോയത്. വിവിധ ജില്ലകളിലായി 25-ലേറെ വാഹനമോഷണക്കേസുകളിലെ പ്രതിയാണ് പിടിയിലായ വിനോദ് മാത്യുവെന്നു പോലീസ് പറഞ്ഞു. വര്‍ക്ഷോപ്പുകള്‍ കേന്ദ്രീകരിച്ച് വാഹനമോഷണങ്ങള്‍ നടത്തുന്നതാണ് രീതിയെന്നും പറയുന്നു.
മോഷ്ടിച്ച വാഹനങ്ങള്‍ തമിഴ്‌നാട്ടിലാണ് വില്‍ക്കുന്നത്. പ്രതിയെ പോലീസ് തിങ്കളാഴ്ച ഉച്ചയ്ക്ക് കൂറ്റനാട്ടെ വര്‍ക്ഷോപ്പിലെത്തിച്ച് തെളിവെടുപ്പുനടത്തി. ചാലിശ്ശേരി ഇന്‍സ്‌പെക്ടര്‍ കെ. സതീഷ്‌കുമാര്‍, എസ്.ഐമാരായ വി.ആര്‍. റെനീഷ്, ഡേവി, സി.പി.ഒമാരായ ഷിജിത്ത്, അതുല്‍, രജിത്ത് എന്നിവരാണ് അന്വേഷണസംഘത്തിലുണ്ടായിരുന്നത്.
