ഏഷ്യൻ കപ്പിലെ തോൽവി; ഇന്ത്യൻ പരിശീലകൻ ഇഗോർ സ്റ്റിമാക്കിനെ പുറത്താക്കണമെന്ന് മുറവിളി
ഇന്ത്യയിലെ ഫുട്‌ബോളില്‍ സമൂലമാറ്റങ്ങള്‍ക്ക് കാരണമാകുമെന്നും ലോകകപ്പ് ഫുട്‌ബോളില്‍ ഇന്ത്യ പന്ത് തട്ടുമെന്നുമൊക്കെയാണ് 2014ല്‍ ഐ.എസ്.എല്‍ തുടങ്ങുമ്ബോള്‍ കേട്ടിരുന്നത്. എന്നിട്ട് എന്തായി, സീസണ്‍ പത്തിലെത്തിയെങ്കിലും പടവലങ്ങ പോലെ താഴോട്ടാണ് ഇന്ത്യയുടെ വളർച്ച.
റൊബോർട്ടോ കാർലോസ്, മാർക്കോ മറ്റാരാസി തുടങ്ങി ലോകഫുട്ബോളില്‍ പേരുംപെരുമയുമുളള ഒത്തിരി താരങ്ങളുടെ കൂടെയൊക്കെ കളിച്ചും പരിശീലിച്ചും ഇന്ത്യൻ താരങ്ങള്‍ മുന്നേറിയെങ്കിലും കാര്യമായ അടയാളപ്പെടുത്തലുകളുണ്ടായില്ല. ഐ.എസ്.എല്ലിലൂടെ വളർന്നുവന്ന യുവതാരങ്ങളിലൂടെ എന്തെങ്കിലുമൊക്കെ ലഭിച്ചിട്ടുണ്ടാകുമെന്ന കണക്ക് കൂട്ടലിലായിരുന്നു ആരാധകർ. ആരവങ്ങള്‍ മുഴക്കി ഖത്തറിലേക്ക് ഇന്ത്യൻ ആരാധകർ കൂട്ടത്തോടെ എത്തിയതും ഇക്കാര്യങ്ങളൊക്കെ മനസില്‍ കണ്ടായിരുന്നു.എന്നാൽ കളിച്ച മൂന്നു മത്സരങ്ങളും തോറ്റ്, തലകുനിച്ച്‌ മടങ്ങിയതോടെയാണ് ഇന്ത്യൻ ഫുട്‌ബോളിനെക്കുറിച്ചുള്ള ചർച്ചകളും ഉയരുന്നത്.
എ.എഫ്.സി ഏഷ്യൻകപ്പിലെ കഴിഞ്ഞ മൂന്ന് എഡിഷനുകളുടെ പ്രകടനം എടുത്തുനോക്കിയാല്‍ നിലവിലേത് പരിതാപകരം എന്ന് തന്നെ വിശേഷിപ്പിക്കേണ്ടിവരും. ഒരൊറ്റ ഗോള്‍ പോലും നേടാനായില്ല എന്നതാണ് ഏറെ സങ്കടകരം. 2011ല്‍ മൂന്ന് ഗോളുകളും 2019ല്‍ നാല് ഗോളുകളും ഇന്ത്യ നേടിയിടത്ത് നിന്നാണ് ഇങ്ങനെയൊരു തളർച്ച. ഇതില്‍ 2019ല്‍ ഇന്ത്യക്ക് ഒരു മത്സരം ജയിക്കാനായിരുന്നു.
ഇന്ത്യയടങ്ങുന്ന ഗ്രൂപ്പ് ബിയില്‍ ആസ്‌ട്രേലിയ ഒഴികെ റാങ്കിങില്‍ ഏറെ മുന്നിലുള്ളവരോ വമ്ബന്‍ പേരുകാരുള്ള ടീമുകളോ ഒന്നുമല്ല ഉസ്ബെക്കിസ്ഥാനും സിറിയയും. ഒന്നു ആഞ്ഞുപിടിച്ചാല്‍ വീഴാൻ മാത്രമെ അവരൊള്ളൂ.
ആസ്‌ട്രേലിയിക്കെതിരായ ആദ്യ മത്സരത്തിലെ ആദ്യ പകുതി തന്നെയാണ് ഈ ടൂർണമെന്റിലെ ഇന്ത്യയുടെ ഹൈലൈറ്റ്. ഗോള്‍ വഴങ്ങാതെ പിടിച്ചുനില്‍ക്കുക എന്ന തന്ത്രം വിജയിക്കുകയും ചെയ്തു. എന്നാല്‍ നീക്കം മനസിലാക്കിയ ആസ്‌ട്രേലിയ കളി മുറുക്കിയതോടെ ഇന്ത്യയുടെ പ്രതിരോധത്തില്‍ വിള്ളല്‍ വിണു, ഫലമോ എതിരില്ലാത്ത രണ്ട് ഗോളുകളുടെ തോല്‍വിയും.
ആദ്യ മത്സരത്തിലെ പോരായ്മകളില്‍ നിന്ന് പാഠം ഉള്‍കൊണ്ടുള്ള മുന്നേറ്റങ്ങള്‍ ഉസ്ബെക്കിസ്ഥാനെതിരായ രണ്ടാം മത്സരത്തില്‍ കണ്ടില്ല. നാലാം മിനുറ്റില്‍ തന്നെ ഇന്ത്യ ഗോള്‍ വഴങ്ങി, ആദ്യമെ ഒരു ഗോള്‍ വീണാല്‍ പരിഭ്രമിക്കുന്ന നിലയിലേക്ക് ഇന്ത്യ എത്തി. പതിനാല് മിനിറ്റുകള്‍ക്കപ്പുറം രണ്ടാം ഗോളും ഇന്ത്യൻ വലയില്‍ എത്തി.
മൂന്നാം ഗോളോടെ ഒന്നാം പകുതി തീർന്നു. ആദ്യ പകുതിയില്‍ തന്നെ ഇന്ത്യയുടെ കയ്യില്‍ നിന്ന് കളി പോയി എന്ന് വേണം പറയാൻ. എന്നാല്‍ ആശ്വാസ ജയം തേടിയാണ് ഇന്ത്യ സിറിയക്കെതിരെ ഇറങ്ങിയത്, അവിടെയും പിഴച്ചു. രണ്ടാം പകുതിയില്‍ നേടിയ ഒരൊറ്റ ഗോളിന്റെ മികവില്‍ സിറിയ ജയിച്ചു.
