കാസര്‍കോട്: ഒറ്റപ്പെട്ട സ്ഥലത്തെ വീട്ടില്‍ താമസിക്കുന്ന വയോധികദമ്പതിമാരെ കത്തിമുനയില്‍ നിര്‍ത്തി മൂന്നംഗ മുഖംമൂടി സംഘം വജ്രംപതിച്ച കമ്മല്‍ ഉള്‍പ്പെടെ എട്ടുപവന്‍ കവര്‍ന്നു.
പരവനടുക്കം കൈന്താര്‍ കോടോത്ത് ഹൗസില്‍ കോടോത്ത് കുഞ്ഞിക്കണ്ണന്‍ നമ്പ്യാര്‍ (78), ഭാര്യ മേലത്ത് തങ്കമണി (68), ബന്ധു കാഞ്ഞങ്ങാട് സൗത്തിലെ എം.ഗോപാലകൃഷ്ണന്‍ (65) എന്നിവരാണ് അതിക്രമത്തിനിരയായത്. വെള്ളിയാഴ്ച അര്‍ധരാത്രിയോടെയാണ് സംഭവം.
മുഖംമൂടി ധരിച്ച സംഘം വീടിന്റെ പിറകുവശത്തെ ഓടിളക്കി നേരത്തേ അകത്ത് കയറിപ്പറ്റിയതായാണ് സംശയിക്കുന്നത്. കുഞ്ഞിക്കണ്ണന്‍ നമ്പ്യാര്‍ ശൗചാലയത്തിലേക്ക് പോയപ്പോഴായിരുന്നു ആക്രമണം. ബഹളംകേട്ട് തങ്കമണി മുറിയില്‍നിന്ന് പുറത്തിറങ്ങിയപ്പോഴാണ് കൈകള്‍ തുണികൊണ്ട് കെട്ടി കത്തിമുനയില്‍ നിര്‍ത്തിയ ഭര്‍ത്താവിനെ കണ്ടത്.
പണവും സ്വര്‍ണവുമെടുക്കാന്‍ ആംഗ്യത്തിലൂടെ അവര്‍ തങ്കമണിയോട് ആവശ്യപ്പെട്ടു. കത്തിമുന തനിക്കുനേരേ വന്നപ്പോള്‍ അവര്‍ സ്വര്‍ണവള ഊരിനല്‍കി. പിന്നാലെ മുറിയിലും മുകള്‍നിലയിലും അലമാരകളിലുണ്ടായിരുന്ന ആഭരണങ്ങളും കൈക്കലാക്കി സംഘം രക്ഷപ്പെട്ടു. മുകള്‍നിലയില്‍ ഉറങ്ങുകയായിരുന്ന ഗോപാലകൃഷ്ണന്‍ പുറത്തിറങ്ങി ചെറുക്കാന്‍ ശ്രമിച്ചെങ്കിലും ഫലമുണ്ടായില്ല.
വിവരമറിഞ്ഞ് ജില്ലാ പോലീസ് മേധാവി മേധാവിയുടെ നേതൃത്വത്തിലുള്ള പോലീസ് സംഭവസ്ഥലം സന്ദര്‍ശിച്ചു. ബേക്കല്‍ ഡിവൈ.എസ്.പി.യുടെ മേല്‍നോട്ടത്തില്‍ പ്രത്യേക അന്വേഷണ സംഘത്തെ നിയമിച്ചു.
