ആദ്യ രണ്ട് മത്സരങ്ങളും വിജയിച്ച ഇന്ത്യ ഈ മത്സരത്തില്‍ അഞ്ച് വിക്കറ്റിന് പരാജയപെട്ടിരുന്നു.
മത്സരത്തില്‍ ഇന്ത്യ ഉയര്‍ത്തിയ 223 റണ്‍സിൻ്റെ വിജയലക്ഷ്യം അവസാന പന്തിലാണ് ഓസ്ട്രേലിയ മറികടന്നത്. 48 പന്തില്‍ 8 ഫോറും 8 സിക്സും ഉള്‍പ്പടെ 104 റണ്‍സ് നേടിയ ഗ്ലെൻ മാക്സ്വെല്ലാണ് ഓസ്ട്രേലിയക്ക് ത്രസിപ്പിക്കുന്ന വിജയം സമ്മാനിച്ചത്. വേഡ് 16 പന്തില്‍ 28 റണ്‍സും ട്രാവിസ് ഹെഡ് 18 പന്തില്‍ 35 റണ്‍സും നേടി.
മത്സരത്തില്‍ നാലോവറുകള്‍ എറിഞ്ഞ പ്രസീദ് കൃഷ്ണയ്ക്കെതിരെ 68 റണ്‍സാണ് ഓസ്ട്രേലിയ അടിച്ചുകൂട്ടിയത്. അവസാന ഓവറില്‍ വിജയിക്കാൻ 21 റണ്‍സ് വേണമെന്നിരിക്കെ 24 റണ്‍സ് താരം വിട്ടുകൊടുത്തു.
ഈ മോശം പ്രകടനത്തോടെ അന്താരാഷ്ട്ര ടി20 യില്‍ ഒരു മത്സരത്തില്‍ ഏറ്റവും കൂടുതല്‍ റണ്‍സ് വഴങ്ങുന്ന ഇന്ത്യൻ ബൗളറെന്ന മോശം റെക്കോര്‍ഡ് പ്രസീദ് കൃഷ്ണ സ്വന്തമാക്കി. 2018 ല്‍ സൗത്താഫ്രിക്കയ്ക്കെതിരെ നാലോവറില്‍ 64 റണ്‍സ് വഴങ്ങിയ യുസ്വെന്ദ്ര ചഹാലിൻ്റെ പേരിലായിരുന്നു ഇതിന് മുൻപ് ഈ റെക്കോര്‍ഡ് ഉണ്ടായിരുന്നത്.
