അമ്മയുടെ സിനിമകളില്‍ തീര്‍ച്ചയായും കണ്ടിരിക്കേണ്ടത് ‘ചിത്രം’; പക്ഷേ, ഞാനത് കാണില്ല! കാരണം പറഞ്ഞ് കല്യാണി പ്രിയദര്‍ശന്‍
സിനിമയില്‍ കഥാപാത്രങ്ങളെ അനായാസേന അവതരിപ്പിക്കുമെങ്കിലും അഭിമുഖങ്ങള്‍ തനിക്ക് പേടിയുള്ള കാര്യമാണെന്ന് കല്യാണി പ്രിയദര്‍ശന്‍ പറയുന്നു. അഭിനയിക്കുമ്പോള്‍ സ്‌ക്രിപ്റ്റൊക്കെ എഴുതിത്തരുന്നതല്ലേ. പൊതുവെ ഇന്‍ട്രോവേര്‍ട്ടായ ക്യാരക്ടറാണ് എന്റേത്. ക്യാരക്ടറില്‍ കയറിയാല്‍ എല്ലാം കൂളായി ചെയ്യാറുണ്ട് കല്യാണി എന്നായിരുന്നു സംവിധായകനും പറഞ്ഞത്.
സ്‌കൂളില്‍ പഠിക്കുമ്പോള്‍ സ്റ്റേജിലൊന്നും കയറിയിട്ടില്ല. സംസാരിക്കാന്‍ പറഞ്ഞാല്‍ എനിക്ക് വിറയല്‍ വരും. അച്ഛനും അമ്മയുമൊക്കെ എന്റെ പോലെയല്ല. നന്നായി സംസാരിച്ചോളും. അമ്മയ്ക്ക് നല്ലൊരു ചാം ഉണ്ട്. എനിക്കതില്ലെന്നും കല്യാണി പറഞ്ഞിരുന്നു.
സിനിമകള്‍ തിരഞ്ഞെടുക്കുമ്പോള്‍ വീട്ടില്‍ സംസാരിക്കാറൊന്നുമില്ല. കഴിഞ്ഞ വര്‍ഷം എനിക്ക് നല്ലതായിരുന്നു. അഭിനയിച്ച മൂന്ന് ക്യാരക്ടറിനും നല്ല സ്വീകാര്യത കിട്ടി. അതുപോലെയൊരു വര്‍ഷം ഇനിയുണ്ടാവുമോയെന്നറിയില്ല. ഓരോ സിനിമയും ഓരോ എക്സ്പീരിയന്‍സാണ്. മലയാളത്തില്‍ ഞാനത്ര ഫ്ളുവന്റല്ല. ഭാഷ എനിക്കൊരു ബാലികേറാമലയാണ്. എന്നെക്കൊണ്ട് കഴിയാവുന്നതിന്റെ അങ്ങേയറ്റം പരിശ്രമം ഞാന്‍ നടത്തിയിട്ടുണ്ട്.
രാശ്മിക എന്റെ അടുത്ത സുഹൃത്താണ്. ഞങ്ങള്‍ കണ്ടിട്ട് കുറേക്കാലമായി. നവരാത്രി സെലിബ്രേഷനില്‍ വെച്ച് ഞങ്ങള്‍ വീണ്ടും കണ്ടു. കഴിഞ്ഞ വര്‍ഷം മുതലാണ് ഞാന്‍ കല്യാണിന്റെ നവരാത്രി ആഘോഷങ്ങളില്‍ പങ്കെടുത്ത് തുടങ്ങിയത്. എല്ലാവരും തിരക്കുള്ളവരാണല്ലോ, ഒന്നിച്ച് കണ്ടപ്പോള്‍ സന്തോഷമായി. ഞാനങ്ങനെ പുറത്ത് പോവാത്ത വ്യക്തിയാണ്. ചെന്നൈയിലാണ് ഞാന്‍ പഠിച്ചത്. എന്റെ സ്‌കൂളില്‍ എല്ലാവരും സ്റ്റാര്‍ കിഡ്സായിരുന്നു. അവിടെ അങ്ങനെ പ്രത്യേകിച്ച് മാറ്റിനിര്‍ത്തലൊന്നുമില്ല. അമ്മയുടെ സിനിമകളില്‍ ചിത്രമാണ് എല്ലാവരും കാണേണ്ടതെന്ന് ഞാന്‍ പറയും.
എനിക്ക് ആ സിനിമ കാണാന്‍ പറ്റില്ല. അമ്മയുടെ സിനിമകളില്‍ ഏറ്റവും പ്രിയപ്പെട്ടത് മഴ പെയ്യുന്നു മദ്ദളം കൊട്ടുന്നു ആണ്. അമ്മ ഇതുവരെ എന്നോട് ഏതാണ് പ്രിയപ്പെട്ട സിനിമയെന്ന് ചോദിച്ചിട്ടില്ല. അമ്മയെ ഞാന്‍ അനുകരിക്കാന്‍ ശ്രമിക്കാറില്ല. അമ്മയുമായുള്ള സാമ്യം വരും. അമ്മയുടെ ചിരിയാണ് എനിക്കെന്ന് ചിലരൊക്കെ എന്നോട് പറഞ്ഞിട്ടുണ്ട്. അച്ഛന്റെ സിനിമകളില്‍ എനിക്കിഷ്ടം തേന്മാവിന്‍ കൊമ്പത്തും കിലുക്കവുമാണ്.
