ഈ ലോകകപ്പില്‍ ഇന്ത്യ തങ്ങളുടെ സമ്ബൂര്‍ണ്ണ ആധിപത്യം തുടരുകയാണ്. ഇന്നലെ ശ്രീലങ്കയെയും തോല്‍പ്പിച്ചതോടെ സെമിഫൈനല്‍ ഉറപ്പിക്കുന്ന ആദ്യ ടീമായി ഇന്ത്യ മാറുകയും ചെയ്തു.
ലീഗ് ഘട്ടത്തില്‍ ആദ്യ നാലില്‍ ഫിനിഷ് ചെയ്യുന്ന ടീമുകളാണ് സെമിയില്‍ എത്തുന്നത്. ഇന്ത്യ ഒരു കളിയില്‍ പോലും സമ്മര്‍ദ്ദത്തിലേക്ക് വഴുതിവീഴാതെയാണ് കളിച്ച ഏഴ് മത്സരങ്ങളും വിജയിച്ചത്. ഈ ലോകകപ്പില്‍ പരാജയം അറിയാത്ത ഏക ടീമുകൾ ഇന്ത്യയും ദക്ഷിണാഫ്രിക്കയുമാണ്.
ഇന്നലെ ശ്രീലങ്കയെ 55 റണ്ണില്‍ ഓൾ ഔട്ടാക്കി 302 റണ്‍സിന്റെ വിജയം നേടിയതോടെ ഇന്ത്യയുടെ റണ്‍ റേറ്റും വലിയ രീതിയില്‍ മെച്ചപ്പെട്ടു. +2നു മുകളിലാണ് ഇന്ത്യയുടെ റണ്‍ റേറ്റ്. ഇന്ത്യക്കും ദക്ഷിണാഫ്രിക്കയ്ക്കും മാത്രമാണ് 2ന് മുകളില്‍ റണ്‍ റേറ്റുള്ളത്. ഇന്ത്യക്ക് ഇനി ഒന്നാം സ്ഥാനം ഉറപ്പിക്കുകയാണ് ലക്ഷ്യം.
ഇന്ത്യയുടെ ഒന്നാം സ്ഥാനത്തിനുള്ള ഏക വെല്ലുവിളി ദക്ഷിണാഫ്രിക്ക മാത്രമാണ്.അവരോടാണ് ഇനി അടുത്ത മത്സരത്തില്‍ ഇന്ത്യയ്ക്ക് ഏറ്റുമുട്ടേണ്ടതും.ഞായറാഴ്ചയാണ് മത്സരം.
