ആഗ്രയുടെ പേര് വിശ്വവിഖ്യാതമാക്കിയത് താജ്മഹൽ ആണെങ്കിൽ ആരുമറിയാത്ത മറ്റൊന്നുകൂടി ഇവിടെയുണ്ട് – ആഗ്രാ പേട.
ദില്ലിയിലേക്കുള്ള യാത്രയിൽ ആഗ്ര, മഥുര റയിൽവെ സ്റ്റേഷനുകളിലെ നിറസാന്നിധ്യമാണ് ആഗ്രാ പേട.കേരളത്തിൽ സുലഭമായ കുമ്പളങ്ങ കൊണ്ടാണ് ഇതുണ്ടാക്കുന്നതെന്നതിനാൽ നമുക്കും ഇതൊന്ന് പരീക്ഷിക്കാവുന്നതേയുള്ളൂ.
ആഗ്രാ പേട
1.കുമ്പളങ്ങ – അരക്കിലോ
2.പഞ്ചസാര – അരക്കിലോ
3.വെള്ളം – ആവശ്യത്തിന്‌
4.ചുണ്ണാമ്പ് – ഒരു ചെറിയ സ്പൂൺ
പാകം ചെയ്യുന്ന വിധം
∙കുമ്പളങ്ങ, തൊലിയും കുരുവും കളഞ്ഞു ചെറിയ കഷണങ്ങളാക്കുക.
∙ഒരു ചെറിയ സ്പൂൺ ചുണ്ണാമ്പ് രണ്ടു ലിറ്റർ വെള്ളത്തിൽ കലക്കി, ഇതിൽ കുമ്പളങ്ങ കഷണങ്ങൾ ഇട്ടു രണ്ടു മണിക്കൂർ വയ്ക്കുക.
∙പിന്നീട് ശുദ്ധമായ വെള്ളത്തിൽ രണ്ടോ മൂന്നോ പ്രാവശ്യം കഴുകി ഊറ്റിയെടുക്കുക.
∙കുമ്പളങ്ങ കഷണങ്ങളിൽ ഫോർക്കു കൊണ്ടു കുത്തി ദ്വാരങ്ങളിടുക.
∙പഞ്ചസാരയും ഒരു കപ്പ് വെള്ളവും യോജിപ്പിച്ചു തിളപ്പിക്കുക.
∙സിറപ്പ് കുറുകി കട്ടിയായി വരുമ്പോൾ കുമ്പളങ്ങ കഷണങ്ങളിട്ട് അൽപനേരം കൂടി തിളപ്പിക്കുക.
∙പിന്നീടു സിറപ്പിൽ നിന്ന് കോരി മാറ്റി, ചൂടാറാനായി, കുമ്പളങ്ങാക്കഷണങ്ങൾ ഒരു ട്രേയിൽ നിരത്തുക.
ആഗ്രാ പേട റെഡി!
