പട്ന: ബിഹാറിലുണ്ടായ ട്രെയിനപകടത്തിന് പിന്നാലെ പത്ത് ട്രെയിനുകള്‍ റദ്ദാക്കി. 21 ട്രെയിനുകള്‍ വഴിതിരിച്ചുവിട്ടതായും റെയില്‍വേ അറിയിച്ചു.
പട്ന-കാശി ജൻശതാബ്ദി (15126), കാശി പട്ന ജൻശതാബ്ദി എക്സ്പ്രസ് (15125) എന്നീ ട്രെയിനുകള്‍ ഉള്‍പ്പെടെ പത്തോളം ട്രെയിനുകളാണ് റദ്ദാക്കിയിരിക്കുന്നത്.
ഡല്‍ഹി-കമാഖ്യ നോര്‍ത്ത് ഈസ്റ്റ് എക്സ്പ്രസാണ് പാളം തെറ്റിയത്. ബുധനാഴ്ച രാത്രി രഘുനാഥ്പൂര്‍ സ്റ്റേഷൻ പരിധിയിലായിരുന്നു സംഭവം. ആറ് കോച്ചുകളാണ് പാളം തെറ്റിയത്. അപകടത്തില്‍ എഴുപതോളം പേര്‍ക്ക് പരിക്കേറ്റതായാണ് റിപ്പോര്‍ട്ട്.അപകടത്തില്‍ നാല് മരണമാണ് ഇതുവരെ റിപ്പോര്‍ട്ട് ചെയ്തത്.
രണ്ട് എ.സി ത്രീ ടയര്‍ കോച്ചുകള്‍ മറിയുകയും മറ്റ് നാല് കോച്ചുകള്‍ പാളം തെറ്റുകയുമായിരുന്നു.സംഭവത്തിൽ റെയിൽവേ അന്വേഷണത്തിന് ഉത്തരവിട്ടിട്ടുണ്ട്.
