തിരുവനന്തപുരം:കേരളത്തില്‍ ജലഗതാഗത സംവിധാനത്തില്‍ ആധുനികതയുടെ വിപ്ലവപാത സൃഷ്ടിച്ച കൊച്ചി വാട്ടര്‍ മെട്രോയെ അടുത്തറിയാൻ തലസ്ഥാന വാസികള്‍ക്കും അവസരം.
നവംബര്‍ ഒന്നുമുതല്‍ ഏഴുവരെ തിരുവനന്തപുരത്ത് സംസ്ഥാനത്തിന്റെ നേട്ടങ്ങള്‍ വിളിച്ചോതിക്കൊണ്ട് അരങ്ങേറുന്ന കേരളീയം ജനകീയോത്സവത്തിലാണ് കൊച്ചി വാട്ടര്‍ മെട്രോ തലസ്ഥാനനഗരിയില്‍ പ്രദര്‍ശനത്തിനായി എത്തുന്നത്.
കേരളീയത്തിന്റെ പ്രധാന തീമായി അവതരിപ്പിക്കുന്ന ജലസംരക്ഷണ ക്യാമ്ബയിന്റെ ഭാഗമായാണ് കൊച്ചി വാട്ടര്‍ മെട്രോയെ അനന്തപുരിയിലെത്തിക്കുന്നത്. കേരളീയത്തിന്റെ പ്രധാന വേദികളിലൊന്നായ പുത്തരിക്കണ്ടം മൈതാനിയിലാവും വാട്ടര്‍ മെട്രോ ബോട്ടിന്റെ പ്രദര്‍ശനം.
കൊച്ചി വാട്ടര്‍ മെട്രോ സര്‍വീസില്‍ ഉപയോഗിക്കുന്ന ബോട്ട് തന്നെയാവും ഇവിടെയും എത്തിക്കുക.പൊതുജനങ്ങള്‍ക്ക് വാട്ടര്‍മെട്രോയില്‍ കയറാനുള്ള അവസരവുമുണ്ടാകും.
